Кур-Черниң шөлдерин аӊдарып, часкы тарылгага белеткеп эгелээн

Таңды кожуун Михаил Санниковтуң тараачын-арат ажыл-агыйының ачызында “Тараалаң Таңды” деп ат-алдарын катап көдүрүп эгелээн. Тараажы бо чылын Кызыл кожууннуң Кур-Черниң шөлдерин аӊдарып, часкы тарылга ажылдарынга белеткеп эгелей берген.

ТР-ниң Көдээ ажыл-агый болгаш аъш-чем сайыдының оралакчызы Владимир Алдачиниң чугаазы-биле алырга, Таңдының «Демниг» көдээ ажыл-агый хереглел кооперативи күрүне декимчезин 2018 чылдан тура ап, материал-техниктиг баазазын чаарткан.

– Михаил Санниковтуң тараачын-арат ажыл-агыйы Таңдының Дүрген суггат системазынга ижин эгелээш, бөгүнде шөлдерин улгаттырып, Кызыл кожуунче үнгени бо. «Демнигниң» машина-техниказы четчир, олар үш муң тос чүс гектар черни хөлезиге алган. Кур-Черниң шөлдерин аӊдарып, часкы тарылга ажылдарынга белеткеп эгелээн – деп, оралакчы дарга чугаалап турар.

Ажыл-агыйның бригадири Буян Монгуштуң чугаазы-биле алырга, оларда машина-техника болгаш үрезиннер ада-чурттуң бүдүрүкчүлеринден. Ол чаа шөлдерге кызыл-тас, сула, хөй чылдыг сиген, шаанда тыва араттар болгаш орус тараачыннар элээн хөйү-биле тарып өстүрүп чораан кырлыг-караны болгаш рапсты тарыырын дыңнаткан. Кур-Черниң чурттакчылары ажылчын олуттар тургустунарынга өөрүп турарын Буян Монгуш онзалап демдеглээн.

– Эрзин оруун дургаар эртип-дүшкен санымда-ла, дыка улуг хову-шөлдер анаа чыдарын көргеш, хомудаар турдум. Шак-ла ындыг октаттынган тараа шөлдери бистиң республикавыстың девискээринде хөй. Михаил Санников-биле дугурушканывыс езугаар Кур-Черниң шөлдеринде часкы хову ажылдарын чоруда бергенинге өөрүп тур мен – деп, Тываның Баштыңы Владислав Ховалыг соцчеткилерде бижээн.

Санниковтуң ажыл-агыйы чылдан чылче бедик дүжүттү тарып өстүрүп, ажаап ап турар. 2019 чылда 37 сая рубльдиң деткимчезин оларга көргүскен. Ол акша-хөреңги-биле чугула херек көдээ ажыл-агый техниказын, эки шынарлыг үрезинни Михаил Санников садып алыр аргалыг болган. Ындыг дузаның ачызында 2020 чылда тараа болгаш өске-даа культуралар тарып өстүрер шөлдү барык үш катап ол улгаттырып шыдаан. Ооң хөй кезиинге тараа аймаанның үрезинин чашкан.