Курорт-дыштанылга комплекизинде тудуг ажылдары кидин түлүк

Тыва Республиканың социал-экономиктиг хөгжүлдезининиң амы-хууда программазының күүселдези-биле Чедерде ажылдар уламчылавышаан.

2020-2024 чылдарда Тываның социал-экономиктиг хөгжүлдезининиң амы-хууда программазын боттандырар хемчеглер күүселдези-биле “Чедер” курорт-дыштанылга комплекизинде тудуг ажылдары кидин түлүк чоруп турар.

Бо чылдың ийиги чартыында, Тывада сурагжаан «Чедер» курортунда хөлдүң эм шынарлыг дузун, малгажын, минералдыг эмненип ижер база эштир сугларын ажыдары планнаттынган.
Бөгүнде Чедер хөлче кирер автомобиль оруунуң септелгези доозулган. Ажык бассейнниг база хөл кыдыынга дыштаныр девискээрлиг комплекстиг акватөптү дыштаныкчыларга ажыдар. Чаңгыс каът 6 корпусту тудуп, инфраструктуразын бүрүнү-биле чаартып турар.

Курорт-дыштанылга комплекизи бүрүнү-биле чаартынган соонда, бир дыштанылга ээлчээнде-ле 400 чыгам кижини хүлээп, кадыкшылын быжыглаар арганы бээрин ТР-ниң Кадык камгалал яамызы дыңнаткан.

Чедер хөлдүң эм шынары шаандан-на билдингир. Эрткен чүс чылдың эгезинде аңаа курортту туткан, сероводородтуг эм малгажы-биле Тывадан дашкаар безин ол алдаржаан турган. Малгаш кеш, чүстер, нерв системазының, холдар-буттар, херээженнер аарыгларын эмнээр шынарлыг.