Бии-Хем кожууннуң Аржаан сумузунга Улуг Тиилелгениң 80 чыл оюнга болгаш Ада-чурт камгалакчызының чылынга тураскааткан «Сактыр бис! Алдаржыдар бис! Чоргаарланыр бис!» деп кожуун чергелиг чогаадыкчы коллективтер аразынга сценажыткан көргүзүглер мөөрейи болуп эрткенин чагырга чери дыңнаткан.
Ада-чурттуң Улуг дайынының киржикчизи, тыва эки турачы Балчат Балчымаевич Түлүшке, ооң төлептиг салгалы, уйнуу – тускай шериг операциязының үезинде маадырлыы-биле чок болган Ай-Хаан Күжүгетке тураскаадып сактыышкын кежээзин эрттирген. Тайбың келир үе дээш амы-тынын берген маадырларга сактыышкынның минутазын чарлаан.
Бии-Хемниң бот-тывынгыр артистериниң шериг-ада-чуртчу көргүзүглери тулчуушкунда маадырларга, офицерлерге, дайынчыларынга, тускай шериг операциязының киржикчилеринге тураскааткан. Мөөрейниң киржикчилери дайын болуушкуннарын диргижидип, дайын чылдарының ырларын болгаш самын чонга бараалгаткан.
Жюри кежигүннери Аржаан суму чагыргазының база культура одааның каттышкан коллективтер бөлүүнүң күүселдезин онзалап демдеглээш, оларны дээди шаңналга төлептиг деп үнелээн. Аржаан школазының, «Аленушка» уруглар садының коллективтери көрүкчүлерниң сонуургалын чаалап алган.
Туранның Марк Оюн аттыг культура болгаш дыштанылга төвүнүң удуртукчузу Айзана Байкара баштаан коллектив «Эң эки сценарий тургузуу» шанналды чаалап алган. Чогаалчылар эвилелиниң кежигүнү Мария Монгушка кады төрээн эки турачы дуңмазынга бижээн шүлүүн бараалгатканы дээш тускай шаңналды тывыскан.
«Уран чүүлдүң тергиин салым-чаяаныглары" номинацияга тускай шаңналды тарлагжылар чаалап алган.
«Онза театржыткан көргүзүг» номинацияга сесерлигжилер «Он бир» деп шиизи-биле тиилээн.
Аржаанның «Энелер» хоочуннар чөвүлелиниң кежигүннери, Туранның «мөңгүн эки турачылары» бот-тускайлаң шиилерин бараалгатканнар.
Хадын сумузунуң чурттакчылары «Эң эки классиктиг көргүзүг» шанналды алган.
«Уран чүүл илередиишкини» тускай шаңналды күш-ажылдын хоочуну, Сөш сумузунуң хүндүлүг өгбези Надежда Байкарага тывыскан. Шивилиг арбаны реквизиттерни эки ажыглааны дээш шаңнаткан.
Аржаан суму чагыргазының, Бии-Хемде Ада-чурттуң дайынчыларының өг-бүлелериниң комитединиң удуртулгазы кожуун чергелиг сактыышкын кежээзин бедик деңнелге эрттиришкени дээш, тыва эки турачының уруу Вера Күжүгетке, маадыр Ай-Хаан Күжүгеттиң ачазы Мерген Күжүгетке болгаш хөй санныг деткикчилерге четтиргенин илереткен.