Тываның А.С. Пушкин аттыг национал ном саңының чурт-шинчилел чогаалы болгаш национал библиография килдизиниң ажылдакчылары Кызылдың 2 дугаар ортумак школазының 7 «б» клазының өөреникчилеринге тыва эки турачы танкистерге тураскааткан таныштырылганы эрттиргенин ном саңы дыңнаткан.
Ол ышкаш «Кым-даа, чүү-даа уттундурбаан» деп викторина өөреникчилерниң сонуургалын хаара туткан. Өөреникчилер айтырыгларның харыыларын шын тыварынга идепкейин көргүскеннер. Хөй айтырыгга харыылааннар белектер алган.
Класстың башкызы Елена Солагай биле өөреникчилер килдистиң ажылдакчыларынга солун, өөредиглиг хемчегни эрттиргени дээш четтиргенин илереткен.