Кышка белеткел: Ажылдарның 93,4 хуузу күүсеттинген

Кызылдың Кызылдың чылыг-энергетика төвү республиканың социал объектилеринче болгаш хөй аалдыг каът бажыңнарже чылыгны сентябрьның 15-тен берип эгелээн.

Бүдүрүлгениң удуртукчузу Андрей Троцан сентябрьның 27-ге, келир средага чедир, хоорайже чылыгны төндүр бериптерин дыңнаткан. Чаа-Хөл, Каа-Хем база Таңды кожууннарның организацияларында база чаагайжыттынган квартираларында чылыг чедип келген. Ак-Довурак, Шагаан-Арыг хоорайларга база Хову-Аксы суурга одалга сезону эгелээн.

2023-2024 чылдың одалга сезонунуң белеткелинче 340 сая рубльди республика, федералдыг база тус чер бюджеттеринден үндүргенин ТР-ниң Одалга болгаш энергетика яамызы дыңнаткан.

Сентябрь 19-туң хүнү-биле алырга, республиканың чылыг-энергетика комплекизиниң, чуртталга-коммунал ажыл-агый болгаш социал адыр объектилериниң кышка ниити белени планның 93,4 хуузу хире. Планнаттынган 1034 хемчегниң 965-и кылдынган.

Чылыг-энергетика комплекизиниң бүдүрүлгелери 87 хуу, чуртталга-коммунал ажыл-агыйы – 95 хуу, социал адыр объектилери – 98 хуу белен. Бүдүрүлгелер план езугаар кышка белеткенгенин одалга болгаш энергетика сайыды Эдуард Куулар медеглээн.

Бо хонуктарда котельнаялар база Кызылдың чылыг-энергетика төвү хереглекчилерге чылыг энергиязын бээриниң график езугаар ажылдарны доозуп, ноябрь 1-ге чедир паспортун алыр ужурлуг.

«Россети Сибирь Тываэнерго» бүдүрүлге база республиканың 11 муниципалдыг тургузуглары ноябрь 15-ке чедир паспорттарын алыр.
Чаа-Хөлдүң котельнаязында амге үеде үш котелдуң бирээзинде капитал септелге чоруп турар, ийи ажылчын котел агреграттары чылыг-биле хандырарынга чедер.

Кадык камгалалының чамдык объектилеринде белеткел ажылдары уламчылавышаан, ол чылыг дамчыдылгазынга шаптыктавас деп, Эдуард Куулар демдеглээн. Тос бичии котельнаялар Ростеххайгааралдың айытканы хемчеглерни бөгүнде боттандырып турар.

Республиканың чедери берге чурттакчылыг суурларынче ниити хереглелдиң 85 хуузу хире хөмүр-дашты чедирген сайыт дыңнаткан. Сентябрьның төнчүзүнге чедир ынаар хөмүр чедирилгези доосту бээр.