«Кыштаг» болгаш «Чаа сорук» төлевилелдерниң киржикчилери малын хүлээткен

Улуг-Хем кожуундан «Кыштаг» болгаш «Чаа сорук» төлевилелдерниң 2021 чылдың киржикчилери бода малын «Ырлыг-Булак» кызыгаарлаан харыысалгалыг ниитилелге хүлээткенин чагырга чери дыңнаткан.

Малчыннарның ийи чыл дургузунда шудургу ажылдап, инектерин эки ажаап турганындан боттарынга артып калыр молдургаларының болгаш бызааларының саны эвээш эвес болган. Олар бо чылгы бызаалары чаш, күскү үеге чедир доругуп алзын база сиген белеткээр ажыл доосту бээрге, орай хүлээдир кылдыр көдээ ажыл-агый эргелели-биле дугурушкан турган.

Улуг-Хем кожууннуң көдээ ажыл-агый эргелелиниң кол зоотехниги Урана Монгуш, «Ырлыг-Булак» кызыгаарлаан харыысалгалыг ниитилелдиң даргазы Мира Кыргыс Арыг-Бажында Адыгжы Димиттиң, Сарыг-Ыйгыл деп черде Эрес Мижит-оолдуң, Ийи-Талда Артур Ламажайның инектерин хүлээп алган.

Төлевилелдиң киржикчилериниң бода малы кышты берге эрткен, чидириглер бар-даа болза, инектер орнунга кыс молдургалары-биле четче хүлээткеннер.