Кыштаглаашкынны хүр-менди ажар дээш

Бо кыш – Тываның малчыннарынга болгаш кожуун-сумулар удуртукчуларынга езулуг-ла шылгалдалыг чыл болган.

Кыш эгезинде улуг харның дүшкени, үргүлчүлелдиг сооктар база күштүг хаттар бергедээшкиннерни тургускан. Чамдык кожууннарда харның кылыны ортумаа-биле 20-35, чер-черлерде 50 сантиметр четкен. Ол эрткен кыштарга деңнээрге 5-10 сантиметрге кылын болуп турар.

Чамдык кыштагларже орук дуглаттынган. Ынчангаш Тываның Баштыңы Владислав Ховалыг малчын турлагларже орук-чирикти ажыдып, одар-белчиирни далбыйлаар ажылды организастаарын кыйгырган.

– Тываның көдээ ажыл-агый эргелелдериниң дыңнатканы болза, бергедешкен аалдарже орукту хардан аштаар ажылдар чоруп турар. Таңды кожууннуң дөрт ажыл-агыйының баазазында база Чөөн-Хемчиктиң бир ажыл-агыйында мал чеминиң республика курлавырын тургускан, хереглелдиг кожууннарже ону чорудуп эгелээн. Ол ышкаш сиген-ширбиил, сула база оодурбаның курлавыры чедер, байдалды хыналдага тудуп турар бис – деп, ТР-ниң көдээ ажыл-агый сайыдының албан хүлээлгезин күүседип турар Юрий Оруспай илеткээн.

Республика мал кыштаглаашкынын хүр-менди ажар дээш 277 муң тонна сиген-ширбиилди күзүн белеткээнин, амгы үеде 132 муң тонназы артканын сагындыраал. Республика курлавырында 340 тонна хоолулуг мал чеми, ооң санында 196 тонна сула, 144 тонна мал чиир холуксаа бар.