«Кызаңнааш 2.0» шериг-ада-чуртчу оюннуң регионалдыг чадазы 55-ки гвардейжи мотоадыгжы даг бригаданың девискээринде болуп турарын ТР-ниң Өөредилге яамызы дыңнаткан.
Шупту салгалдарның ынак оюну – «Кызаңнааш 2.0» бо удаада чаа хевирде, чурагайлыг технологияларны ажыглавышаан, бедик шынарлыг эртип турар.
Чедиден 10 харлыг уруглар аразынга баштайгы маргылдаалар эрткен. Республика чергелиг оюнда тус черниң тиилекчилери чыглып келген. Тываның барык шупту кожууннарындан 16 команда киришкен. Маргылдаа ырак-узак Мөңгүн-Тайга, Бай-Тайга, Тожу, Өвүр, Сүт-Хөл дээш оон-даа өске кожууннардан уругларны хаара туткан.
Командалар байырлыг чыскаалга, «Бирги дуза», «Лазертаг», «Шериг хептиг маадырлар», «Снайпер» спортчу оюнга күжүн шеневишаан, төрээн чуртунуң төөгүзүнге хамаарышкан айтырыгларга харыылааннар.
Шериг-ада-чуртчу оюннуң регионалдыг чадазының биче бөлүүнге бирги черни Бай-Тайга кожууннуң Н.С. Конгар аттыг Бай-Тал ортумак школазының «Демнигбейлер» командазы бүзүрелдии-биле чаалап алган.
Ийиги черни Чеди-Хөл кожууннуң командазы, үшкү черни Барыын-Хемчик кожууннуң школачылары ээлээн.
«Кызаңнааш 2.0» оюннуң регионалдыг чадазы бедик деңнелге эрткен. Башкылар болгаш партнерларывыс маргылдааның эки талаларын демдеглээннер. Шериг-ада-чуртчу оюн бүдүн май ай дургузунда болур. Дараазында ортумак, улуг бөлүктер база тускай командалар ортузунга маргылдаалар үргүлчүлээр. Тиилекчилер Сибирь федералдыг округка эртер маргылдааларга республиканы төлээлээр» – деп, организакчыларның бирээзи, Тывада Баштайгылар шимчээшкининиң удуртукчузу Эртине Куулар демдеглээн.