Кызыл-Дагның командазы бирги черни бүзүрелдии-биле чаалап алган

Чылдың-на Хемчик бажы Бай-Тал суурга бөмбүктүг хоккей маргылдаазын эрттирери чаңчыл болган. Хоккейге ынактарның үрде манааны кышкы оюннарын байырлыг байдалга ажытканын Бай-Тайга кожууннуң чагырга чери дыңнаткан.

Бо удаада маргылдааны Тываның бөмбүктүг хоккей маргылдааларының каш дакпыр чемпиону, спорттуң хоочуну Карим Салчактың 50 харлаан оюнга тураскаадып эрттирген.

ТР-ниң спорт сайыдының бирги оралакчызы Саян Монгуш, Бай-Тайга кожууннуң баштыңы Экер Байс спортчуларга болгаш аарыкчыларга байырын чедирип, солун болгаш көрүштүг оюннарны база тиилелгени күзээн. Карим Каң-ооловичиге “Бай-Тайга кожууннуң күш-культуразының болгаш спортунуң алдарлыг ажылдакчызы” деп хүндүлүг атты тывыскан.

Ийи хүн үргүлчүлээн республика чергелиг хоккей маргылдаазынга шыырак дээн он команда киришкен. Дош шөлүнге «изиг-изиг» тулчуушкуннарның түңнелинде дөрткү черге Аксы-Барлыктың, үшкү черге Ийи-Талдың, ийиги черге Бай-Талдың (Урянхай) хоккейжилери төлептиг болган. Бирги черни Кызыл-Дагның командазы бүзүрелдии-биле чаалап алган.

Хоккейге ынактар оюн бедик деңнелге эрткенин онзалап демдеглээннер.