Барыын-Хемчик кожуунунуң Кызыл-Мажалык суурда 1000 олуттуг стадион тудуунда ажылдар кидин түлүк. Тываның Чазаа чоннуң киирген саналын деткип, келир үениң спорт объектизин чурттакчыларның күжү-биле тудуп турар. График езугаар шупту ажылдар сентябрьда доостур ужурлуг.
"Республиканың эң улуг кожууннарының бирээзи – Барыын-Хемчик сентябрьда 100 чылдаан оюн демдеглеп эрттирер. Чурттакчыларга белек кылдыр Кызыл-Мажалык суурда 1000 олуттуг улуг стадионнуң тудуун эгеледивис" – деп, Тываның Баштыңы Владислав Ховалыг бодунуң арынында бижээш, чон спорт-биле өнңүктежир кылдыр кылымал шөлдүг бут бөмбүүнүң шөлүн база маңнаар кокпаларны чадарын, а кожуунга бедик деңнелдиг спортчу болгаш культурлуг хемчеглерни эрттирер спортчу объектини тудуп турарын тайылбырлаан.
Келир үениң стадион тудуу 40 хуу доозулган, чер ажылын «Восток» кызыгаарлаан харыысалгалыг ниитилел кылган. 2024 чылда алганы 60×34 метр хемчээлдиг кылымал футбол шөлүн чаткан, Тываның Спорт яамызы кожуунга ындыг немелде шөлдү ам база бээр. 1000 олуттуг трибунаны, ГТО-га белеткенир тудуг демирлерин болгаш спортчу шөлдерни эптеп турар, келир үениң стадионунуң девискээрин херимнеп эгелээн.
Тываның эң улуг кожууннарының бирээзиниң 100 чылдаанынга уткуштур, амыдыралдың аңгы-аңгы адырларын хаара туткан байырлыг хемчеглерниң улуг даңзызын январьда-ла ажылдап кылган. Кожууннуң чурттакчылары «Чүс буянныг ажыл-херек» деп акцияга идепкейлиг каттыжып, төрээн суурларының чаагайжыдылгазынга бүгү-ле дузаны чедирип турар.
Сентябрьда болуп эртер байырлалдың эң кол хемчеглери: шыдыраа база волейбол, тыва хүреш, тыва ча адары, 21,2 километрге чартык марафон база аът чарыжының маргылдаалары болуп эртер.