Барыын-Хемчик кожууннуң Кызыл-Мажалык сумузундан Евгения Соянова социал керээге үндезилээн күрүне деткимчезиниң ачызында хеп чуур черни эрткен чылын июнь айда ажыдып алган.
Аныяк өг-бүле сумузунда эрги эмнелге оран-савазының бир өрээлин септеп кылып, федералдыг программаның акшаландырыышкыны-биле хеп чуур машиналарны, суг агар хоорзаларны, суг сордурар насос болгаш аккумуляторну садып алгаш, ажыл-херээн эгелээни ол.
– Кудукту боттарывыс кактырып, септикти база кылып алдывыс. Хеп чугдурар улустуң саны хөй. Чайгы үеде улус бажыңнарынга чугдунуп алыр болгаш хереглекчилерниң саны эвээжей бээр. Чогум доктаамал кээп турар улус база бар.
Машинага бир катап хеп чугганы дээш (хеп чуур чүүлдери бар болза) төлевири – 250-400 рубль. Ол ышкаш «Өөрүнчүг шактар» деп акцияны чарлаан бис. Ол үеде улус хевин чиигелделиг өртекке чугдуруп алыр аргалыг. Хеп чуур порошок халас, кондиционерни чаңгыс чуулда үезинде ажыглааны дээш үжен рубльди төлээр.
Хереглекчилер хевин дужаапкаш чоруй баар, айыткан шагында ап алыр. Колдуунда ажылдап турар улус кээр, чүге дизе оларның бажыңынга хеп чуур чайы чок болур. Бистиң талавыстан кол сорулгавыс оларның үезин камнап бээри. Удавас хеп басканы дээш база немелде ачы-дуза чедирилгезин киирер бис – деп, Евгения ажылын таныштырган.
Хеп чуур черниң ээлери хевистер чуур бетинде, ооң баштайгы довурактыг хирин арыглаар күштүг базыышкынныг херекселди база садып алган.
Чайгы үеде чурттакчы чон хевистер, чиңге чадыглар, хеп чуур машиназынче сыңмайн барган кылын чоорганнар, шывыгларын дужаарын Евгения тайылбырлады. «Күзүн чагыглар үзүлбейн баар. Өөм ээзи Ай-Херел хүнде 15 чедир хевистер, чиңге чадыгларны чуп турар. Улаштыр кышкы хеп чуур үе келир» – деп, ол чугаалап турар.
Аныяк өг-бүле ийи кыстыг, бир оолдуг. Олар ачы-буян акцияларының доктаамал киржикчилери. Хеп чуур черниң ээлери кожуунда чааскаан чурттап турар улуг назылыг хоочуннарның болгаш хөй ажы-төлдүг өг-бүлелерниң хевин халас чуп берип турар. Өөредилге чылының эгезинде “Школаже чыгдынарынга дузалаш” деп акцияда база чылдың-на киржип, үргүлчү деткип чоруур.
Кызыл-Мажалыкта хеп чуур черниң энерел сеткилдиг ээлери
20 апреля 2022
82