Кызыл-Мажалыкта Улуг салгалдың харылзажыр төвү ажыттынган

Барыын-Хемчик кожууннуң төвү Кызыл-Мажалыкта Улуг салгалдың харылзажыр төп ажыттынган чагырга чери дыңнаткан.

Россияның Социал фондузунуң Тыва Республикада салбыры төптүң аалчыларынга биче ном саңнарын, дыштанылга булуңнарын, интернетче үнер компьютерлерни аңгылаан.

Төптү улуг назылыг кижилер аразында харылзажырынга, саң-хөө болгаш компьютер билиин бедидеринге идиг бээр кылдыр ажыткан.

Культура албан черлери, социал камгалал эргелелдери, хөй-ниити каттыжыышкыннары, эмнелге организациялары темалыг беседаларын, лекцияларны болгаш мастер-класстарны эрттирип турар. Оон аңгыда аргыттынып-даараныр, аъш-чем кылыр мөөрейлер, делгелгелер, селгүүстээшкин болгаш экскурсиялар база болуп турар.

Буурул баштыглар онлайн-банкыларны ажыглаарын, бузурукчуларны билип алырын, акша-хөреңгизин айыыл чок болдурарын билип алыр аргалыг.