Сүт-Хөл кожууннуң Кызыл-Тайга сумузундан Саяна Ондар эрткен чылын социал керээ езугаар күрүне деткимчезин алгаш, беш электрилиг хой кыргыыр машина, хол-биле кыргыыр беш хачы, бистер чидидер, үстээр станок болгаш хачылар октаар движокту садып алгаш, чымыштыг ишче шымныгып кирипкен.
Бо хүннерде кыргыкчы Сүт-Хөл кожууннуң девискээринде, Дугай деп черде, Кызыл-Тайга сумузунуң малчыннары Айдыс биле Уран Ондарларның аалында шээр малды кыргаан.
Саяна Ондарга баштаткан бригада өшкү кыргылдазының үезинде сумузунуң малчын турлагларын кезип, ажылдап турган. Амгы үеде олар чоок-кавы малчын аалдарның хоюн кыргып кирипкен.
– Ада-ием малчыннап чораан болгаш школага өөренип тургаш-ла хой кыргып эгелээн мен. Өөренгеним аайы-биле шээр мал кыргыырда, хол хачызын ажыглаар-дыр мен. Хүнде 20 шаа ажыг хойну кыргыптар чордум. Чоорту электрилиг машинаже шилчиир мен.
Эрткен чылын комиссия мээң төлевилелимни чүүлдүг деп көрген соонда, бо чылын шээр мал кыргып кирипкеним ол. Бо кыргылда сезонунда өөм ээзи, дөргүл-төрелим-биле демнежип, ажылдап тур бис. Бир хой кыргыырга – 100 рубль.
«Социал керээ» программаның ачызында дөргүл-төрелим-биле акша-төгерикти ажылдап алыр аргалыг апардывыс. Бежен хойну кыргааш, беш муң рубльди ажылдап алырга, амыдыраарынга дөгүм-дүр – деп, Саяна Ондар ажылын таныштырган.
Малчыннардан чагыг кээрге, кыргыкчылар чидиг хачылары-биле чепсегленгеш, аалдарже үнүптерлер.
Чуруктарны Шончалай Ховалыг тырттырган