Июнь 25-те Кызылдың аэропортундан бирги дорт доктаамал рейс ужуп үнген, ам рейстер неделя санында Кызылдан средада 22:10 шакта ужуп, а Улан-Батордан четвергте 05:20 шакта ээп кээр. Кызыл биле Улан-Батор аразында шактың ылгалы +1 шак. «КрасАвиа» авиакомпания ол хүнден эгелеп август төнчүзүнге чедир рейстерни кылыр.
«Бир дугаар ужудуп үндүрген даштыкы маршрутка Чурттуң Президентизиниң ужутканы улуг уткалыг. Владимир Владимирович Путин 2024 чылдың сентябрьда Тываже ажыл албан-биле келген соонда, Кызылдан Моолдуң найысылалы Улан-Баторже ужуп үнген. Бистиң аэропортувустуң делегей чергелиг секторунуң ажылы оон албан езузу-биле эгелээн» – деп, Тываның Баштыңы Владислав Ховалыг бодунуң блогунда төөгүлүг болуушкунну демдеглээн.
Чурттуң Президентизиниң болгаш Россияның Чазааның деткимчези-биле Кызылдың аэропорту чаарттырганын Тываның Баштыңы сагындырган. Бөгүнде бистиң республикада чаңгыс аэропорттуң оран-савазын каайлы, кызыгаар, фитосанитарлыг, ветеринарлыг болгаш санитар-карантинниң хыналдаларын чорударынга бүрүн дерээн. Бир шакта 100 пассажир эртер кылдыр кылган агаар хыналда пунктузун 2024 чылда-ла ажыткан.
Амгы үениң АТR-42 самолеттары «Кызыл – Улан-Батор» деп чаа маршрутту хандырар, ол дээрге АТR француз-итали концернниң бүдүрген турбовинтилиг ортумак ыракшылдыг пассажир самолеттары-дыр. Ында пассажирлер олуттарының саны 40 биле 50 аразында ылгалып турарын "42" деп сан көргүзер. Ниитизи-биле 3 шак ужар. Билеттерниң өртээ 7120 рубльден эгелээр. Май 30-ден садып эгелээн билеттерни krasavia.ru деп сайтыдан болгаш өске-даа баш бурунгаар чагыг дөстеринден садып ап болур.
Дорт ужудуушкуннуң ажыттынганы Тываның болгаш Моолдуң чурттакчыларынга, ол ышкаш үшкү чурттарның хамаатыларынга транспорттуң чедингирин хөгжүдеринге бистиң республикага чугула базым деп Тываның орук-транспорт комплекизиниң сайыды Шораан Чыргал-оол дыңнаткан.
Бистиң республиканың найысылалы-биле даштыкы чурттуң аразынга дорт рейс туристерниң болгаш ажыл-агыйжы аян-чорукчуларның аргыжылгазын элээн чиигедиптер. Моолдуң найысылалынче дорт чедип кээринден аңгыда, пассажирлер Азия-Оожум океан регионунуң өске-даа чурттарынче чедери эптиг апаар: Улан-Батордан Кыдатче (Пекин, Гонконг, Хох-Хото), Мурнуу Кореяже (Сеул), Японияже (Токио) дээш, мурнуу Азияның өске-даа чурттарынче рейстерже каттыжа бээр.
«Тываның Чазаа сөөлгү чылдарда, Кызылдың аэропортунга делегей чергелиг авиа-эрттирилге пунктузун ажыдар, ол ышкаш Кызыл – Улан-Батор – Кызыл аразынга ужудуушкунга белен авиакомпанияны дилеп тывар ажылды чоруткан. Россияның Президентизиниң болгаш Чазааның деткимчези-биле ол төлевилелге херек инфратургузугну – ужудуп-хондурар шөлдү чаартырындан эгелээш, каайлы-кызыгаар доскуулдарынга аңгы терминалды тургузарынга чедир ажылдарны Тываның Баштыңы Владислав Товарищайович хандырган» – деп, Шораан Чыргал-оол демдеглээн.
Бодунуң авиапарыгында аңгы-аңгы хевирниң 50 хире самолеттары болгаш вертолеттары бар Красноярск крайның регионалдыг ужудукчузу «КрасАвиа» АН-ниң край иштинде база Красноярск – Улан-Батор чурттар аразында аргыжылганы чорудуп турар, бо маршрут компанияның маршрудунда даштыкыже ийи дугаар угланыышкын болур. Авиакомпанияның www.krasavia.ru албан езунуң сайтызындан рейстиң расписаниезин көрүп, билетти садып база немелде ачы-дузаны долдуруп ап болур.
