Кызылда калчаа аарыынга удур 700 хире дириг амытанны тарыткан

Тываның найысылалы Кызыл хоорайда хамчык аарыгларынга удур албан чериниң тускай мергежилдиглериниң рейдилери ээзи чок дириг амытаннарда аарыгны илередири-биле уламчылап турар.

Тываның Баштыңы Владислав Ховалыгның эрттиргени аппарат хуралынга бо ажылдың түңнелдерин чугаалашкан. Кызылда калчаа аарыынга удур кызыгаарлаттынган хемчеглер эгелээнден бээр 670 ажыг дириг амытанны тарыткан.

Октябрьның 30-де Кызыл хоорайның девискээринге черлик ыттардан ук аарыгның тарадыкчызы илереттинген соонда, республиканың чазаа 60 хонук дургузунда кызыгаарлаттынган хемчеглер киирер дугайында шиитпирни хүлээп алганын сагындыраал. Ооң девискээри – Кочетов кудумчузунда 35 дугаарлыг бажың ооң чоогунда халдавырдан аараан дириг амытанны туткан черни долгандыр, үш километр радиус девискээр болурун тодараткан.

ТР-ниң Ветеринария албанының дыңнатканы-биле алырга, карантин чарлаан хүнден эгелээш эрткен неделяның дургузунда, халдавырның үнген черин дезинфекциялаан. Рейдилер үезинде чаа таварылгалар илереттинмээн, 735 дириг амытанны калчаа аарыынга удур тараан, ооң иштинде 560 азырал база 175 ээзи чок дириг амытан бар.

План езугаар ветеринарлыг профилактика хемчеглери уламчылавышаан. Боттарының дириг амытаннарын дараазында адресте тарылга пунктузунга тарыдып алырын сүмелээн: Кызыл хоорай, Оюн Курседи кудумчузу, 6, 9:00 шактан 21:00 шакка чедир дыштаныр хүннер чок ажылдаар. Телефоннар: 2-95-11, 8-9016444925. Ачы-дуза чедирилгези халас.

Кызыгаарлаттынган хемчеглер үезинде болгаш ооң соонда-даа сагыыр хемчеглерни дириг амытаннарның ээлеринге сагындырган. Аарыгның халдавыры черде, оът-сиген аразында бооп болур, ыттың буттарын болгаш бодуңар идииңерни эки арыглап аштаңар, карантин үезинде азырал амытаннарыңарны халдавырның үнген черинче чоокшулатпазы күзенчиг.