Кызылда олимпийжи курлавырлар школазының баазазынга школа-интернатты ажыдар

Тываның Баштыңы Владислав Ховалыг Красноярск хоорайга болуп эрткен Иван Ярыгин кубогу дээш делегей чергелиг маргылдаага чайынналчак көргүзүглерлиг болган спортчулар-биле ужурашкан.

Владислав Ховалыг тиилекчилерни болгаш оларның дагдыныкчыларын дарый шаңнап-мактаар даалганы ТР-ниң Спорт яамызынга берген.

Ужуражылга үезинде спортчуларның моон соңгааргы белеткелинге, аңгы-аңгы маргылдааларга болгаш белеткел чыыштарынче тренерлери-биле кады чорууру дээн ышкаш, өске-даа айтырыгларны сайгарган. Оон аңгыда Кызылда олимпийжи курлавырлар школазының баазазынга школа-интернатты ажыдарын база чугаалашкан.

ТР-ниң спорт сайыды Субудай Монгуш школа-интернат бүдүн республиканың булуңнарындан хүрештиң хевирлеринге оолдар, уругларны хаара тудуп, аңгы-аңгы деңнелдиг маргылдааларга оларны белеткээр тускай чер апаарын чугаалаан.

Субудай Монгуш регионда спортту хөгжүдеринге улуг деткимчези дээш, республиканың удуртулгазынга өөрүп четтиргенин илереткен. Каш чыл бурунгаар эгелээн ажыл үре-түңнелдерни эккеп эгелээнин ол чугаалаан. «Чаа олимпийжи үе-чада эгелээн, бистиң спортчуларывысты херек чүүлдер-биле хандырып, белеткениринге таарымчалыг байдалдарны тургузар дээш, бүгү-ле чүвени кылыр бис» – деп, сайыт демдеглээн.