Тываның Чазааның Ажаалга банкызы-биле керээ езугаар республикада тренажер дериг-херекселдер-биле чүметтинген спортчу шөлдерни тургузуп эгелээн. Кызыл хоорайга бо чылын чеди чаа спорт шөлүн тургузарын планнаттынган.
Тренажерларлыг шөлдерни 3, 9, 15 дугаар школаларның, оң база солагай талакы эриктерниң дачаларында, Титова кудумчузунуң 23 дугаар бажыңының девискээринде кылдынган. Ол ышкаш Иркутская кудумчузунуң хөй квартиралыг бажыңнарының чанында тургузуп турар.
«Кижи бүрүзү спортка хандыкшылдыг болурун чедип алыры чугула. Ынчангаш кырында чадыглыг, телефоннарны октаар черлерлиг, ажыглаар дүрүмү билдингир спортчу шөлдерни кылып турар бис. Тренажер дериг-херекселдиг спортчу шөлдүң эки талазы – бертинип-кемдээр айыыл эвээш, спортчу белеткел үре-түңнелдиг болур» – деп, Ажалага банкызының Кызылда салбырының удуртукчузу Алина Таспанчик чугаалаан.
Эрткен чылын Ажаалга банкызы-биле кады ажылдажылганың ачызында республиканың кудумчуларында спортчу ийи шөл – Кызылда база Ак-Довуракта туттунган.
«Ажалага банкызынга четтиргенивисти илередип тур бис. Бо чылын хоорай хары угда чеди дериг-херекселдиг спортчу шөлдерни алганы – Кызылдың хөгжүлдезинге улуг салыышкын. Спортчу шөлдер аныяктарны болгаш кадык амыдыралды шилип алган кижилерни хаара тудар деп бүзүрелим улуг. Ону херек кырында көрген бис: эрткен чылын Шумов алышкыларның тураскаалының чанында туттунган спорт шөлүнге хөй чон чыглып, күш-культураже хандыкшып, кадыкшылын быжыглап турар. Тренажерлар ам-даа эки ажылдап турар. Чурттакчы чон спортчу шөлдерже доктаамал кээп турар, ындыг болганда – төлевилел, шынап-ла, херек» – деп, Кызыл хоорайның мэри Айдын Сарыглар демдеглээн.
«Бистиң школавыстың девискээринде спорт шөлүн тургусканынга четтиргенивисти илереттивис. Өөреникчилер тренажерларны аажок сонуургап, чапсарлар үезинде безин оон ыравас-тыр. Чылыг үеде күш-культура кичээлдери болгаш спортчу оюннар база маңаа эртер» – деп, Кызылдың 9 дугаар гимназиязының күш-культура башкылары чугаалаан.