Кызылдың аэропорту бодунуң төөгүзүнде бир дугаар даштыкы авиакомпанияның ужар-хемезин хүлээп алганын албан чери дыңнаткан.
Аэропорт Мьянманың агаар аргыштырыкчызы Myanmar National Airlines авиакомпанияның Airbus A320 самоледун хүлээп алган. Мьянманың Президентизи Мин Аун Хлайн Тывага албан-езузу-биле Тываже кээп чораанын сагындыраал.
Албан чериниң медеглээни-биле алырга, ооң мурнунда аэропорттуң командазы даштыкы авиакомпанияларның агаар хемелерин хүлээвейн турган. Аэропорттуң аргыжылга албанының тускай мергежилдиглери Myanmar National Airlines авиакомпанияның экипажы болгаш борт үдекчилери-биле амы-хууда чугаалажып, чурукка тырттыржып алган.
Кызылдың аэропортунуң төөгүзүнде база бир чугула арын ажыттынганын коллектив онзалап демдеглээн.
Даштыкы күрүнениң удуртукчузунга баштаткан делегация найысылалдың тураскаалдыг черлеринге чедип, Тываның Национал музейинде Чиңге-Тей I базырыындан тывылган скиф эртинелерниң делгелгезин көрүп, В. Көк-оол аттыг Национал театрга тыва хөөмей-сыгытты, оюн-көргүзүгнү болгаш Национал оркестрниң хөгжүм күүселдезин сонуургаан.
Мин Аун Хлайн найысылалды кезип чорааш, хоорайның болгаш долгандыр бойдус-чурумалдың каас-чаражын, ол ышкаш тус черниң чурттакчыларының хүндүлээчелин демдеглээнин Тываның Баштыңы Владислав Ховалыг дыңнаткан. Аян-чорук кыска үе ишти үргүлчүлээн-даа болза, Мьянманың Президентизи болгаш делегация кежигүннери Азия дипте республиканың дугайында тодаргай билип ап, Тываның турисчи күчү-шыдалынга бедик үнелелди берген.
Найысылалдың чаартынган аэропортунга чоокта чаа Кызылга болуп эрткен делегей чергелиг IV сарыг шажын шуулганының хүндүлүг аалчыларын болгаш киржикчилерин уткуп база үдеп турган.
