Кызылдың девискээринде чурттакчылыг черлерге оруктуң айыыл чок чоруунуң демдектерин тургузар
«Амыдырал инфратургузуу» национал төлевилел боттаныышкынында көрдүнген акша-хөреңгини ажыглап, «Кара-Хаак (Вавилин ээтпээ) суурже орук» автомобиль оруунуң бо чылын чаарткан участогунга орук шимчээшкининиң айыыл чок чоруунуң хемчеглерин боттандырар. Ол ажылды 2025 чылдың ноябрь 1-ге чедир доозар.
ТР-ниң Орук-транспорт яамызының дыңнатканы-биле алырга, бо оруктуң 6-дан 10-гу километринге чедир участокка чырык чагыларын тургузуп, чадаг кижилер кылаштаар оруктарны болгаш кежер черлерни, кылымал дөстектерни, 18 автобус доктаамын дериирин планнаан.
2023 чылда, бо автомобиль оруунуң 10-13-кү километрин септеп, таарымчалыг байдалче киирген. Ол орук участогунда чуртталга база социал инфратургузуг объектилери турбаанындан, эгезинде септелге төлевилелинге автобус доктаамнары кылыры көрдүнмээн турган.
Ындыг болзажок, сөөлгү ийи чылда байдал өскерилген: орук дургаар чаа тудуглар болгаш чугула социал албан черлери туттунуп, орукка чадаг кижилерге таарымчалыг байдалды хандырары болгаш айыыл чок чорукту бедидери негеттинип келген. Ол айтырыгларны шиитпирлээри-биле 2025 чылдың ноябрь 1-ге чедир оруктуң бо участогунга 12 чаа автобус доктаамын тудар, ол ышкаш орук демдектерин тургузуп, чадаг кижилер эртер черлерни тускайлап, орук шимчээшкининиң дүрүмнерин хажыткан таварылгалар тырттырар камераларны тургузары планнаттынган.
Ук угланыышкында трассаның орук шимчээшкининиң айыыл чок чоруун хандырар дээн элээн каш хемчеглер санында «Кара-Хаак суурже (Вавилин ээтпээ) автомобиль оруунуң 0-тен 6-гы километринге чедир участокту чаартырынга төлевилел-смета документациязын ажылдап кылганын, Орук-транспорт яамызы дыңнаткан. Бөгүн ук төлевилел документациязы күрүнениң чогумчалыг чөпшээрелин алган.
Оон өскеде, Кызыл агломерациязында орук шимчээшкининиң айыыл чок чоруун хандырары-биле, Тыва Республиканың «Тыва Республиканың транспорт системазын хөгжүдери» күрүне программазының «Орук шимчээшкининиң айыыл чок чоруун бедидери» иштики программазы-биле, бо чылын Кызылга болгаш хоорай хевирлиг Каа-Кем суурда светофорларны тургузары планнаан. Чыл төнчүзүнге чедир Каа-Хем суурда Таежная биле Чооду Кидиспей кудумчуларының ийи белдиринге база 5 дугаар гимназия дужунда Ангара бульвары кудумчузунга автоматчыткан өйлекчилер көстүп келир.