Кызылдың мэриязынга ТР-ниң Чазак Даргазының оралакчызы Шолбан Сендаш база мэр Айдын Сарыгларның башкарылгазы-биле пассажирлер аргыштырылгазын чорудуп турар хууда сайгарлыкчылар-биле ужуражылга болган.
Россияның Иштики херектер яамызының Кызыл хоорай талазы-биле эргелелиниң, Күравтоинспекциязының, ТР-ниң Орук-транспорт яамызының, прокуратура, хоорайның департамент төлээлери хуралга киришкен.
Хуралдың кол темазы – Кызылдың оруктарынга айыыл чок чоруктуң хемчеглерин күштелдирери, чажыт маршрут автобустарын илередири, август 30-де болган айыыл-халап дег орук озал-ондаан болдурбас талазы-биле шиитпирлерни кады хүлээп алыры.
Кызыл чырык хып турда халдып эрткен микроавтобус чолаачызы хөй-ниити транспортун башкарар чөпшээрели болгаш эргези чок болгаш кудумчуну ногаан чырыкче кежип турган чадаг кижилерни, оларның аразында уругларны үстүргенин сагындыраал. Сөөлүнде бир херээжен кижи эмнелгеге чок болган.
«Хүннүң-не хоорай оруктарынче 85 санныг транспорт үнүп турар, оларның 56-зы чогуур лицензияларлыг, доктааткан категорияның эргелерлиг, маршрут карталарлыг, доктааткан хоойлужудулга езугаар ажылдаар ужурлуг хууда кижилер» – деп, Кызылдың мэри Айдын Сарыглар демдеглээн.
Ак сеткилдиг эвес пассажирлер аргыштырылгазын чорудуп турар улусту илередири-биле хоорайда рейд хемчеглерин доктаамал чорудуп турар. Маршрут карталары чок тос таварылганы илереткен, лицензия чок ажылдап турган алды автобусту туткан.
Россияның Иштики херектер яамызының Кызыл хоорай талазы-биле эргелелиниң начальниги Ярослав Казанцев чажыт пассажирлер аргыштырылгазын чорудуп турар улусту тыпканын Күравтоинспекциязынга дарый дыңнадырын хууда сайгарлыкчылардан дилээш, шупту долгаашкыннар чажыт дээрзин айыткан. Дыңнадыг бүрүзү айыыл-халапты болдурбайн барып болурун ол демдеглээн.
Бо чоокку үеде мэрияны чурум үрекчилерин автоматчыткан арга-биле хайгаараар «Айыыл чок хоорай» системазынга кожар ажылдар доостур. Ол ышкаш пассажирлер аргыштырылгазын чорудуп турарларның, транспорт херекселин бүрүткелин чаартыр. Кызылдың мэриязы Күравтоинспекциязы-биле рейдилерниң санын көвүдедирин дугурушкан.
ТР-ниң орук-транспорт комплекизиниң сайыдының оралакчызы Денис Хангай пассажирлер аргыштырылгазын хоойлу езугаар чорудар талазы-биле албан черлер аразының комплекстиг хемчеглер планын бадылаар, ол чүгле хоорай эвес, а муниципалдар аразының маршруттарынга база хамааржыр.
Чуруктарны мэрияның парлалга албаны тырттырган