«Бизнес-спринт» (Спортту шилип алыр мен) федералдыг төлевилели-биле күш-культура-спорт залын тудар. Төлевилел массалыг спорттуң ажыглалче чаа тудугну тудуп, бар инфратургузугну эде чаартыр сорулгалыг. Бюджет акша-хөреңгизи болгаш күрүне-хууда кады эштежилге таварыштыр инвесторларны хаара тудуп, акшалындырыышкынны хандырар.
Спорт залы 850,19 дөрбелчин метр ниити шөлдүг, чаңгыс каът оран-сава болур. Залды биче бут бөмбүүнге, хол бөмбүү, баскетбол ойнаар кылдыр кылган болур. Немей туткан кезээнге вестибюль, херээжен болгаш эр улуска солуттунуп кеттинер, тренерлерге база техниктиг өрээлдерни, арыгланыр черлерни тускайлаан.
Бөгүнге чедир төлевилел-санаашкын документилерин ажылдап кылган, күрүнениң эксперт үнелелин алган. Тудуг материалдары, сендвич-панельдер, демир конструкциялар-биле хандырылга керээлери чардынган, ол ышкаш «Авангард» КХН-биле тудугну хынаар дугуржулга чардынган. Амгы үеде тудугнуң таваан кударынга белеткел ажылдары эгелээн.
Вавилин ээтпээ – Тываның найысылалының дүрген хөгжүп турар микрорайоннарының бирээзи. 10 муң хире кижи чурттап турар ол черде комплекстиг тудуг сайзыраан. Кызылдың чиңгине планындан алырга, микрорайон сөөлүнде барып 30 муң ажыг чурттакчылыг апаар, аңаа үш школаны тудары планнаттынган.
“Өөредилге” национал төлевилел күүселдези-биле 2022 чылда Кызыл – Кара-Хаак оруунуң 7-ги километринде 825 өөреникчиге бирги школаны тудуп эгелээн. Эрткен чылдың сентябрьда Ада-чурттуң маадырлары аттыг 20 дугаар школа ажыттынган. Чурттуң Президентизи Владимир Путин республикага ажыл албан аайы-биле чорааш, «Чугула чүүлдер дугайында чугаалар» деп бирги кичээл-биле чаа школаның өөредилге чылын ажыткан.
Хүннүң-не 15-20 км эртип, хоорайның аңгы-аңгы школаларынче өөренип чоруп турган уруглар ам бажыңнарының чоогунда, амгы үениң өөредилге негелделеринге дүгжүп турар чырык, чылыг школада өөренип турарлар.
2025 чылда «Өг-бүле» национал төлевилели езугаар өөредилге черлеринде уругларга таарымчалыг байдалдарны тургузуп, немелде олуттарны тургузары-биле ол микрорайонда 280 олуттуг чаа уруглар садын тудуп эгелээн. 2027 чылдың декабрьда школа назыны четпээннер уруглар албан чериниң тудуу доостур ужурлуг.
Удавас ол-ла микрорайон боду поликлиникалыг апаарын Тываның Баштыңы дыңнаткан. «Төлевилел-санаашкын документилери-биле ажылдап турар» – деп, ол немээн. Ук микрорайонну чаагайжыдар ажылда ам-даа уламчылаар.