Бөгүн, Россияда чоннарның дылдар хүнүнде, Аныяктар өргээзинге билдингир театр болгаш кино актеру, телебашкарыкчы, «МаксимуМ» КВН командазының капитаны, «Билиг» ниитилелиниң лектору Михаил Башкатов-биле ужуражылга болуп эрткен.
“Баштайгыларның шимчээшкини” уруглар болгаш аныяктарның бүгү-российжи шимчээшкининиң регионда салбырының идепкейжизи, 15 харлыг Сайгал Самбуу ужуражылганы башкарып эрттирген.
Лекторну зал долу аудитория четтикпейн манап турган. Аалчы Кызылдың школачыларын болгаш аныяктарын тыва дылга «Экии» деп мендилээнин чыылганнар диңмиттиг адыш часкаашкыннары-биле хүлээп алган.
Михаил Башкатов чырыдыышкын төлевилелдериниң чорудуу-биле чурттуң аңгы-аңгы регионнарынга доктаамал киржип турар. Тывага ол бир дугаар келгени бо.
Лекцияның кол темазы – чурттуң дыл талазы-биле хөй янзылыын болгаш чон бүрүзүнүң культурлуг өнчүзүн кадагалап арттырары.
Актер аныяк-өскенни төрээн дылынга хумагалыг болурунче кыйгырып, каш дылды билир улусту кезээде магадап чоруурун онзалап демдеглээн. «Россия – хөй-хөй чоннарны каттыштырган улуг күрүне. Чон бүрүзү бодунуң төрээн дылы, езу-чаңчылдары, байырлалдары-биле онзагай. Орус, төрээн болгаш аңгы-аңгы чоннарның классиктиг чогаалдарын номчууру чугула» – деп, лектор чугаалаан.
Михаил Башкатов уругларның сонуургаан айтырыгларынга тодаргай харыыларны берген. Эң-не нарын болгаш харыысалгалыг роль дээрге ада болуру деп дөрт ажы-төлдүг актер демдеглээн.
Аалчы Россияның эң улуг Тубтен Шедруб Линг сарыг шажын хүрээзинге, “Азия төвү” скульптура комплекизинге четкен. Сибирьжиге белек кылдыр национал хөгжүм херексели – хомусту сөңнээн.
Бөгүн бүгү чурттуң аңгы-аңгы чоннарының төрээн дылдарының хүнүн төөгүде бир дугаар демдеглеп эрттирип турар бис. Бодунуң чогаалдарын орус болгаш төрээн дылы авар дылга бижип чораан улуг шүлүкчү Расул Гамзатовтуң төрүттүнген хүнүнде демдеглээр кылдыр 2025 чылдың ноябрь 4-те Президентиниң Чарлыы-биле доктааткан.
Төрээн дыл чоннуң өнчүзү болур. Бо байырлал чурттуң чон бүрүзүнүң бот-тускайлаң культурлуг өнчүзүн кадагалап сайзырадыры чугула дээрзин сагындырып турар болгаш чоннар аразында чаңгыс демни быжыглаарынче угланган.
