Өлең ховузунда үш адаанның оюну

Ада-өгбелерниң чырыткылыг адынга тураскааткан үш адаанның оюну Сүт-Хөл ко¬жууннуң девискээринде 2005 чылдан тура уламчылап турар. Бо чылын ээлчег езугаар Суг-Аксы сумузунуң деткимчези-биле мындыг онза ыдыктыг байырлал болуп эрткен.

Сүт-Хөл кожууннуң девискээринде Өлең ховузунга аът чарыжын, 18 харга чедир мөгелер хүрежин, баг адар маргылдааны эрттирген.

Республикада аът спортун сайзырадырынга үлүүн киирип чоруур чылгычылар база сонуургалдыг кижилер аът чарыжынга соодуп белеткээн чүгүрүктерин алды аңгы салыгга салган. Чоннуң ынак байырлалы, чылгы малдың чараш маргылдаазынга ниитизи-биле 242 аътты киириштирген.

Байза кирген аъттарның ээлеринге, аът мунукчуларынга медальдар, хүндүлүг бижиктер болгаш акша шаңналдарын тывыскан. Дараазында аът чарыжын эрттирери-биле кубокту Бора-Тайга сумузунуң чагырга даргазы Сайгал Ондарга хүлээткен.
Он сес харга чедир мөгелер аразынга хүрешке ниитизи-биле 32 элээди мөге ачыр-дачыр тудушкан. Чидиг-чидиг сегиржип алыышкыннарның түңнелинде эң шыырак дөрт мөге Түметей Ширижик («Элээди Арзылан мөге", Бора-Тайга, "Алдар" СК), Алдаржы Ондар (Ишкин, "Алдар" СК), Онзагай Ооржак (Бора-Тайга, "Алдар" СК), Доржу-Самбуу Ондар (Кара-Чыраа) олар шылгарап үнген.

"Алдар" спорт клувунуң мөгелеринге кожууннуң мурнундан серге, Ак-Даш сумузунуң чагырга даргазы Хаяа Ондар иртти берип деткикчилээн.
Бора-Тайга сумузундан ийи мөгеге кожууннуң Төлээлекчилер хуралының депутады Артур Ховалыг ийи иртти берген. Шаңналче кирген элээди мөгелерге акша шаңналы болгаш өртектиг белектерни тывыскан.

Тыва ча адар оюннуң баг адар хевиринге республика чергелиг багжылар маргылдаазынга Тываның аңгы-аңгы булуңнарындан 20 эр, беш херээжен адыгжылар киришкен.

Эр багжылар аразынга Ринчен Ондар (Сүт-Хөл кожуун) мерген адыгжы болуп тиилеп үнген. Херээжен багжылар аразынга Чайырмаа Делгер-оол беш херээжен багжыларның аразындан шылгарап үнгеш, бирги черни чаалап алган.