Ленинка арбанынче оптиктиг харылзаа шугумун шөйген

Эрткен чылгы бүгү-российжи бадылаашкынның түңнелдери-биле «Чурагайлыг дең эвес чорукту чайладыры 2.0» федералдыг төлевилелди күүседип, Бии-Хем кожуунда Ленинка арбанынче болгаш Мөңгүн-Тайга кожуунда Тоолайлыг суурже соталыг харылзааны болгаш интернетти киирер.

Төлевилелдиң күүседикчизи – ТР-ниң Чурагайлыг хөгжүлде яамызы Ленинка арбанынче оптиктиг харылзаа шугумун шөйгенин дыңнаткан. Ам харылзаа баазазын тургузары аркан.

Тоолайлыг суурже оптиктиг харылзаа шугуму тудар ажылдар удавас эгелээр. Оон харылзааның антенна-суургазын тудуп, тургузар. Дериг-херекселди четкиже кожар хуусазы – октябрь ай.

Ол ышкаш албан чери “МТС” харылзаа оператору Адыг-Кежиг сумузунда 4G четкизин күштелдиргенин медеглээн. Кылдынган ажылдарның түңнелинде интернет харылзаазы ортумаа-биле 20 хуу дүрген дамчыыр апарган. Ам тус черниң чурттакчылары болгаш аян-чорукчулары чурагайлыг сервистерни таарымчалыг байдалдарга ажыглаар аргалыг.

Төлевилелдиң күүселдези-биле Тывада 250-ден 500 кижи чурттакчылыг 13 суурже оптиктиг харылзаа шугумун шөйген. Оптиктиг шугумнуң ниити хемчээли 987 километр.