Ак-Тал суурнуң чурттакчылары – чаңгыс чер-чуртуу, тыва эки турачы Бегзи-Хуурак Донгактың эрткен маадырлыг оруунга чоргаарланыр. Бегзи-Хуурак Хелиң-оолович Улуг-Хем кожууннуң Хендерге сумузунда Могай-Бажы деп черге 1921 чылда төрүттүнген.
Дайын-чааже аъттаныптар бетинде аныяк Бегзи-Хуурак, арга-дуржулгалыг шыырак эш-өөрү мөгелерин шуптузун октааш, Тыва Арат Республиканың “Арзылаң мөгези” атты чедип алган.
Арзылаң мөге Бегзи-Хуурак Донгак Тыва Арат Республиканың революстуг шерииниң эң шыырак мөгелериниң бирээзи чораан. Тываның наадымнарының 128 мөге киржикчилиг 1942-1943 чылдарда маргылдааларынга ийи улай шүглүп үнген.
Ада-чуртун камгаалаары-биле Бегзи-Хуурак Донгак 1943 чылдың сентябрь 25-те бодунуң үе-чергези оолдар, кыстар-биле кады фронтуже аъттаныпкан. Дайынның аар-берге оруктарын ол өске эш-өөрү-биле деңге базып эрткен. Тулчуушкун шөлдеринге эрес-маадырлыг мөзү-шынарын көргүскен.
Тыва эки турачыларның эрес-дидим мөчээниниң дугайында ТАР-ның шериг херектериниң талазы-биле яамының таңмазын баскан шынзылга-бижикти маадырның ада-иези алган. 1944 чылдың чайынында тыва эки турачылар фронтудан ээп чанып кээп турган. Оларнын аразында Бегзи-Хуурак Донгакты сураглаарга-даа чок болган. Маадырның ада-иези, дөргүл-төрели чыглып алгаш, дайын шөлүнден ээп келбээн Бегзи-Хуурактың сөөлгү езулалын кылганнар-даа.
Хүннер, айлар шуужуп-ла турган. Бир-ле хүн, “Мөге Бегзи-Хуурак чанып келген!” дугайында өөрүнчүг медээ тарай берген. Эки турачының ээп келгенинге Хендерге чону кайгап, бүзүревээн кижилер албан-биле келгеш, көрүп-даа турганнар. «Мөчээн кижи дирилген деп чүве ол-дур» дижип, аразында чугаалажып турганнар.
Гвардейжи улуг сержант Бегзи-Хуурак Донгак фронтудан чанып келгеш, Тыва автономнуг областың наадымнарынга хүреш маргылдаазынга катап киржип эгелээн. 1947-1948 чылдарда Наадым хүрештеринге кымга-даа октатпайн, база катап тергиидеп үнгүлээн.
Арзылаң мөге Бегзи-Хуурак Донгак Алдар орденниң III чергези, Ада-чурт Дайыны орденниң I болгаш II чергелери болгаш хөй-хөй медальдар-биле шаңнаткан. Ооң адын "Тываның XX чүс чылда алдарлыг кижилери" деп Күрүне номунче киир бижээн.
