Мука Оптуг-оол назылап кыраан-даа болза, мал-маганын өстүрүп, холу куруг черле орбас, бир-ле ажылды кылган турарын кожууннуң херээженнер чөвүлели дыңнаткан.
Хүндүлүг дыштанылгада кырган-ава хөй санныг уругларның болгаш уйнуктарының ынак энези. Ол Бай-Тайга кожууннуң Көп-Сөөкке хөй ажы-төлдүг өг-бүлеге 1946 чылда төруттунген. 1956 чылда школага өөренип киргеш, сески классты чедиишкинниг дооскан. Улаштыр өскус арткан дуңмаларын азыражыр дээш, совхозка паштанчылап, күш-ажылчы базымнарын эгелээн.
Күш-ажылдың хоочуну 1960 чылда комсомол кежигүнүнче кирген. Ол комсомол ажылынга идепкейлиг киржип, ынчан-на эки ажылы болгаш идепкейжи чоруу дээш шаңнадып-мактадып эгелээн. Хостуг үезинде аргыттынып, дааранырынга, ырлаарынга ынак. Спорттуң аңгы-аңгы хевирлери сонуургап, маргылдааларга удаа-дараа киржип, шаңналдыг черлерни ээлеп турган.
1969 чылда боду ышкаш бөдүүн оол Доңмас Иргитович-биле амыдыралын тудуп, шайлалгазын эрттирип, аас-кежиктиг чуртталгазының таваан салганнар.
Мука биле Донмас Оптуг-оолдар кайызы-даа мөзү-бүдүштүг, ажык сеткилдиг, ажылгыр өг-бүле. Буянныг ада-ие беш оол, беш кысты чырык черге бодараткаш, азырап өстүрген. Ажы-төлү шупту аңгы амыдыралдыг, өглуг-баштыг, эртем-билиглиг, уругларлыг чурттап чоруурлар.
Маадыр ие кады чурттаан эжи бурганнай берген соонда, холу салдынмайн, хөй ажы-төлун өскүссүретпейн, кижизиг кылдыр азырап өстурүп каан. Ажы-төлү-биле чаңгыс черге чыглып келгенде, ол аажы-чаң талазы-биле кижизидилгениң чагыг-сумезин болганчок-ла суртаалдаар.
Күш-ажылдың хоочуну суму болгаш район совединиң депутадынга хөй удаа соңгудуп чораан. Хөй-ниитижи – идепкейлиг ажылы дээш, хөй-хөй шаңнал-макталдарның эдилекчизи. Ол назынының иштинде багай чүүлдерге сунду чок, ажыл-ишке эрес-кежээ, шудургу ава.
Кырган-ава биче сеткилдиг, чончу, каткы-хөглүг, оюн-баштак аажы-чаңныг. Амгы үеде 30 чаштың ынак кырган-авазы, 11 уйнуунуң энези.
Мука Иргитовна – күш-ажылдың хоочуну, төлептиг Маадыр ие, улуг назылыг эне.