Маадыр мөгениң чырык адын мөңгежиткен

Сарыг-Сеп суурга тускай шериг операциязының маадыры, Каа-Хем кожууннуң Начын мөгези Сайдаш Кыргыстың чырык адынга тураскааткан хүреш маргылдаазы болуп эрткенин ТР-ниң Дээди Хуралы дыңнаткан.

ТР-ниң Дээди Хуралының Даргазы [id365637382|Каң-оол Даваа], депутат Начын Чамбалдоо маргылдааның байырлыг ажыдыышкынынга киришкен. Олар Сайдаш Кыргыстың эрес-дидимин онзалап демдеглеп, ооң маадырлыг чоруун езулуг ада-чуртчу болгаш шериг хүлээлгезинге шынчы чоруктуң үлегери деп демдеглээн.

Ол ышкаш маадырның ада-иезинге «Тускай шериг операциязының киржикчизиниң адазынга», «Тускай шериг операциязының киржикчизиниң авазынга» деп медальдарны тывыскан.

Сайдаш Кыргыс – республиканың эмчи колледжизиниң доозукчузу, эмчи взводунуң командири. Ол дайынчы эштерин камгалап, амы-тынын маадырлыы-биле берген.

Маадыр мөгениң хүрежип чораан чедиишкиннерин үнелеп, адын мөңгежидери-биле, амы-тынындан чарылган соонда, «Каа-Хем кожууннуң Начын мөгези» деп атты тывыскан.

Сарыг-Септиң стадионунга 40 ажыг шыырак мөге хүрешкен. Сүт-Хөлден Тываның Хартыга моге Кайгал-оол Ондар шүүлген, Чөөн-Хемчиктен Арзылаң мөге Сылдыс Монгуш үжүүрлешкен. Үшкү-дөрткү черлерде Тываның Начын мөгези Юрий Кызыл-оол (Каа-Хем) биле суму Арзылаңы Сүлде Донгак (Сүт-Хөл).

Шылгарап үнген, хоочун болгаш аныяк, «Тиилелгеже чүткүл», «Чараш девиг», «Чараш арга» тускай шаңналдарга төлептиг болган мөгелерни тус-тузунда шаңнап-мактаан.

Каа-Хем кожууннуң хоочун мөгелерин хүндүткеп, оларга суй белектерни тудускан.

Чагырга чери тускай шериг операциязының маадырының ада-иези Спартак Байыр-оолович биле Мая Михайловнага кожуунга тыва хүрештиң сайзыралынга киирген үлүг-хуузу дээш өөрүп четтиргенин илереткен.

Сайдаш Кыргысты Эрес-дидим чоруктуӊ ордени-биле мөчээн соонда шаңнаан.