Июнь 22-де фашистиг Германия Совет Эвилелинче оор езу-биле халдап кирген. Ада-чурттуң Улуг дайынының төнмес-батпас каргыштыг 1941-1945 чылдары ынчаар эгелээн.
Бо дайынга дыка хөй совет солдаттар эрес-дидими-биле тулчуп кирген, сая-сая кижилер амы-тынындан чарылган. Бистиң өгбелеривис деңнеп четпес аар өртек-биле ыдыктыг тиилелгени чаалап ап, келир үениң салгалдарынга тайбың-чаагай чуртталганы сөңнээн. Ынчангаш июнь 22-ни сактыышкынның болгаш кажыыдалдың хүнү кылдыр доктааткан.
Тываның чурттакчыларын бүгү-российжи “Сактыышкынның чулазы” деп онлайн-акцияга катчырынче чалап турар. Ук хемчег июнь 15-тен эгелээнин сагындыраал. Күзелдиг кижи бүрүзү деньпамяти.рф сайтка виртуалдыг чуланы кыпсып болур. Ук акцияның оператору – «Салгалдарның сактыышкыны» ачы-буян фондузу. Ук фонд кывыскан чулаларның санынга дең акша-хөреңгини аңгылааш, Ада-чурттуң Улуг дайынының хоочуннарга тускай медицина дузазын чедиреринче угландырар.
Эртен республиканың чурттакчылары ук акцияга катчып, Ада-чурттуң Улуг дайынының маадырларының тураскаалдарының баарынга амы-тынындан чарылган дайынчыларны сактып, чечектер салыр езулалга киржип, сактыышкынның чулазын кыпсыр.
Кызылга “Сактыышкынның чулазы” бүгү-российжи акция чаңчыл езугаар Тиилелге шөлүнге 21.00 шакта болуп эртер.
#Сактыышкынныңболгашкажыыдалдыңхүнү #Сактыышкынныңчулазы #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
