Маадырларның адын мөңгежидер

Ада-чурттуң Улуг дайынының чылдарында ийиги Украина фронтузунуң 52-ги Армиязының 25-ки танк полугунга алдарлыг Т-34 танкының механик-чолаачызы болуп эрес-дидим тулчуп чораан бистиң чаңгыс чер-чурттуувус – Совет Эвилелиниң Маадыры Чүргүй-оол Намгаевич Хомушкунуң 105 харлаанынга тураскааткан “Тыва маадыр” деп төөгү шагын Сүт-Хөл кожууннуң уругларның үлегер-майыктың ном саңы эрттирген.

Төөгү шагының кол сорулгазы – аныяк-өскенниң шериг-ада-чуртчу кижизидилгези болгаш Ада-чурттуң Улуг дайынының Маадырларының адын мөңгежидери.

1943 чылдың май 20-де он бир тыва танкист фронтуже аъттаныпкан. Чүргүй-оол Намгаевичиниң башкарганы танкының экипажы узун болгаш алдарлыг орукту эрткен. Украинаның Рыжановка болгаш Кобыляки суурларының чоогунга дайзынның камгалалын чылча шаварынга экипаж онза шылгараан. Бежен ийиги армия күчүлүг танк согуу-биле фашистерниң камгалалын Чернокаменка чоогунга чылча шапкаш Умань хоорайже углапкан. Үш куяк машина, бирээзи Чүргүй-оолдуу, фашистерже дорт шураткаш, шавар халдаашкынны чоруткан.

Сес маадыр танкист дайзынның 24 самоледун, 80 автомашиназын эжелеп ап, 100 хире солдат, офицерлерни дүжүп бээринче албадапкаш, тудуп алган. Полктуң өске танкылары келгижеге чедир олар эрестиг тулушканнар. Ол тулчуушкунга эрес-маадырлыг, коргуш чок чоруу дээш Чүргүй-оол Хомушкуга Совет Эвилелиниң Маадыры атты ССРЭ-ниң Дээди Совединиң Президиумунуң 1945 чылдың март 24-те Чарлыы-биле тывыскан.

Ада-чурттуң Улуг дайынының соонда эвээш эвес чылдар шуужуп эрткен, ынчалза-даа эрес-дидим маадырларывыс кажан-даа уттундурбас.