Бөгүн ТР-ниң Дээди Хуралынга тускай шериг операциязының үезинде маадырлыы-биле чок болган дайынчыларга шаңналдар тыпсыр езулал болуп эрткен.
ТР-ниң Чазак Даргазының оралакчызы Шолбан Сендаш, Тыва Республикада кол федералдыг инспектор Александр Вавилихин, Дээди Хуралдың хораа даргазы Эрес Хуурак, Россияның Маадыры Чалым Чүлдүм-оол маадырларның чоок кижилеринге болгаш төрелдеринге ханы кажыыдалын илереткен. Дайынчыларның чырык адынга кажыыдалдың минутазын чарлаан.
Россия Федерациязының Президентизиниң чарлыы-биле, тускай шериг операциязының үезинде көргүскен маадырлыг болгаш эрес-дидим чоруу дээш, Тыва Республиканың он чурттакчызын шаңнаан.
Эрес-дидим чорук орденнерин мөчээниниң соонда, биче сержант П.М. Ешин (Жуковтуң медалы-биле база шаңнаткан), биче сержант А. М-Н. Ооржак, биче сержант А.Ф. Холмогоров, анаа дайынчы Ч.С. Соян, анаа дайынчы Ч.Ю. Самчан (Жуковтуң медалы-биле база шаңнаткан), анаа дайынчы М.Э. Монгуш, кол старшина О.О. Ооржак оларга тывыскан.
Жуковтуң медалын старшина А.Д. Дамдинов биле биче сержант С.С. Ооржактың чоок улузунга дамчыткан.
«Россия Федерациязының камгалалын быжыглаарынга киирген үлүг-хуузу дээш», «Тускай шериг операциязының киржикчизинге» деп медальдарны кол старшина В.В. Севекпиттиң авазы Елена Севекпитке биле өөнүң ишти Буяна Кууларга тывыскан.
Хөй ажы-төлдүг ава Елена Ооржаковнаның чугаазы-биле алырга, Владислав Севекпит ооң ийис оолдарының улуу. «Оолдарым иелээн тускай шериг операциязының девискээринге турган. Улуу дайынчы даалгалар күүседип тургаш, хары черге бажын салды. Хеймери ам-даа ында хевээр, ол санинструктор. Владислав чаңгыс оолдуг, уйнуум ам студент» – деп, маадырның авазы чугаалаан.
Чуруктарны Юрий Ширшин тырттырган