Өвүр кожуундан тускай шериг операциязының үезинде маадырлыы-биле амы-тынындан чарылган дайынчыларга тураскааткан хемчеглер болуп эрткенин кожууннуң чагырга даргазы Айдыс Куулар дыңнаткан.
– Начын-Мерген Кууларның чырык адынга хостуг хүреш маргылдаазы Хандагайтының спорт школазынга болуп эрткен. Маргылдааны маадырның оглу Доржу спорт мастериниң кандидады атты чедип алганынга тураскаадып эрттирген. 2011-2013 чылда төрүттүнген оолдар аразынга хүрешке 200 ажыг спортчу киришкен.
Дус-Дагның культура бажыңынга Ай-Херел Дамчаттың чырык адынга тураскааткан ада-чуртчу ырылар мөөрейи болуп эртен. Аңаа ат-алдар чок ыраажылар киришкен. Киржикчилер ырлажырга сагыш-сеткил дойлуп турду.
Маадыр оолдарывыстың адын мөңгежидери-биле оларның ада-иези, өг-бүлези, төрелдери аңгы-аңгы хемчеглерни эрттирери чанчыл апарган. Тускай шериг операциязынга маадырлыы-биле амы-тынындан чарылган чаңгыс чер чурттугларывыска мөңге алдар.
