Маадырның чырык адынга тураскааткан хүреш маргылдаазы

Бии-Хем кожууннуң Туран хоорайның төп стадионунга тускай шериг операциязының киржикчизи, полицияның майору Владимир Шабалинниң чырык адынга турскааткан хүреш маргылдаазы болуп эрткенин чагырга чери дыңнаткан. Маадырга Эрес-дидим чоруктуң орденин мөчээниниң соонда тывыскан.

Хүреш маргылдаазынга республиканың аңгы-аңгы булуңнарындан 48 мөге киришкен. Маргылдааның шылгараан дөрт шыырак мөгези: Тываның Хартыга мөгези Начын-Мерген Ооржак (Сүт-Хөл) шүүлген, Чаа-Хөл кожууннуң Начын мөгези Кежик Шыырап үжүүрлешкен. Үшкү-дөрткү шаңналдыг черлерде Кызыл кожуундан Начын Хомушку биле Эрзин кожуундан Амыр-Санаа Соян.

Ол ышкаш хүреш үезинде чараш оюнну көргүскен мөгелерге тускай шаңналдарны тывыскан. «Хоочун мөге» – Монгуш Орлан (Чөөн-Хемчик), «Чараш арга» – Монгуш Айдыс (Бии-Хем), «Чараш девиг» – Кара-оол Шолбан (Бии-Хем), «Тиилелгеже чүткүл» – Карманов Денис, «Эң бичии мөге» – Саян Балбаки (Бии-Хем).

ТР-ниң Дээди Хуралының депутады Аяна Монгуш бичии мөгени деткип, акша шаңналын тывыскан.

Маадырның төрелдери болгаш чоок кижилери, маргылдааның эрттирикчилери тиилекчилерни шаңнап-мактаан.