Ишкин сумузундан тускай шериг операциязының киржикчизи Владимир Хуналдайның чырык адынга тураскааткан республика чергелиг хол бөмбүүнүң маргылдаазы болуп эрткенин чагырга чери дыңнаткан.
Маргылдаага 18 команда киришкен. Хол бөмбүкчүлери спортчу чүткүлдү болгаш чаңгыс демниин көргүскен. 1-ги черни Онза байдалдар яамызының (60 муң рубль), 2-ги черни Ишкинни (50 муң рубль), 3-кү черни Сүт-Хөлдүң (40 муң рубль), 4-кү черни Каа-Хемниң (30 муң рубль) командалары тус-тузунда алган.
Маадырның ада-иези болгаш чоок кижилери демнежип, маргылдааны бедик деңнелге эрттирген.
Бодунуң берген даңгыраанга төнчүзүнге чедир шынчы болуп, шериг хүлээлгезин сыныш чок күүсеткеш, бажын салган маадырны «Эрес-дидим чоруу дээш» орден-биле мөчээн соонда шаңнаан.
Ишкинчилер чаңгыс чер чурттуунуң маадырлыг чоруун кезээ мөңгеде утпас.
