Маадырның чырык адынга тураскааткан кыргыкчылар мөөрейи

Эйлиг-Хем сумузунуң Демир-Суг” деп черде “Аныяк өг-бүлеге – кыштаг” төлевилелдиң киржикчизи Алдын Чепскийниң аалынга Улуг-Хем кожууннуң сумуларындан кыргыкчылар аразынга “Тергиин кыргыкчы-2026” мөөрей болуп эрткенин суму баштыңы Рада Быштак-оол дыңнаткан.

Кыргыкчылар мөөрейин тускай шериг операциязының үезинде маадырлыы-биле бажын салган дайынчы, хөй чылдарда Эйлиг-Хем суурга малчын аалдарга хой, өшкү кадарып, кыргыкчылап чораан Мерген-оол Оолактың чырык адынга тураскаадып эрттирген.

Улуг-Хем кожууннуң чагырга даргазы Эрес Мандан-оол хой кыргыкчыларын деткип келген. Эйлиг-Хемниң удуртулгазы киржикчилерге байыр чедирип, чедиишкинниг киржирин күзээн.
Беш команда (үш эр, үш херээжен) киришкен: Эйлиг-Хем 1, Эйлиг-Хем 2, Арыскан, Арыг-Үзүү, Ийи-Тал.

Беш шак хире уламчылаан мөөрейниң түңнелинде, 1-ги черде Эйлиг-Хем 1 командазы. 47 баш хойну 2 шак 50 минута кыргаан.
2ги черде Ийи-Талдың, 3-кү черде Эйлиг-Хем 2-ниң, 4-5 черлерде Арыг-Үзүүнүң биле Арысканның кыргыкчылары.

“Эң улуг назылыг кыргыкчы” – Ийи-Талдың төлээзи 62 харлыг Салбак Кыргыс, “Эң аныяк кыргыкчы” – Эйлиг-Хемден 21 харлыг Мерген Чындаа.

“Эң дүрген кыргыкчы” дээш дөрт херээжен, үш эр кыргыкчы маргылдашкан. Херээжен улустан Арыг-Үзүүнден Саида Монгуш шылгараан. Ооң үези 9 минут 48 секунда. Эр улустан Эйлиг-Хемден Айдың Биче-оол бирги черде, үези – 17 минут 39 секунда.

Маргылдааның кол деткикчизи – маадырның өг-бүлези, дөргүл-төрели. Эрткен чылын Арыг-Үзүү сумузунга болган хой кыргыыр маргылдааның тиилекчилери – Эйлиг-Хемниң командазы бо чылгы киришкен командаларга акша шаңналдарын тывыскан. Ажыктыг хемчег бедик деңнелге эрткен, киржикчи бүрүзүн шаңнаан.

Кожууннуң культура эргелелинден аныяк ыраажылар Алдын-Белек Норбу, Кежик Доспанай чараш ырылары-биле кыргыкчыларның хей-аъдын көдүргеннер.