Бии-Хем кожуунда «Сүт болбаазырадыр суур» төлевилелди боттандырып эгелээн. Аржаан сумузунда сүт болбаазырадыр цехке чырыкты кошкан соонда, тускай автомашина Хадын, Тарлаг суурларның, Чкаловка арбанының көдээ ишчилеринден болгаш чоок кавы аалдардан сүттү май айдан эгелээш хүлээп эгелээрин тус чер чагыргазы дыңнаткан.
Бии-Хем кожууннуң чагырга даргазы Алдай-Мерген Ховалыгның даңнадып турары-биле алырга, чизе езугаар Аржаан, Тарлаг, Хадың суурда 500 ажыг саар инек бар. Ол ышкаш төлевилелдиң амыдыралда боттандырыышкыны көдээ черниң чурттакчыларынга доктаамал орулганы болгаш чаа ажылчын олуттарны тургузарын чагырыкчы демдеглээн.
«Аржаанда 157, Чкаловкада 16 өреге хууда малын тудуп турар. Чоокта чаа ТР-ниң көдээ ажыл-агый болгаш аъш-чем сайыдының оралакчызы Баир Ховалыгга баштаткан яамының төлээлери «Сүт болбаазырадыр суур» деп шенелде төлевилелди таныштырып, Аржаан, Тарлаг, Хадың суурнуң чурттакчылары-биле ужуражылганы эрттирди.
Социал керээге үндезилээн күрүне деткимчезиниң акша-хөреңгизи-биле сүткүр уксаалыг инектерни садып ап болур. Аңаа киржир күзелдиг улустуң саны хөй. Төлевилелдиң күүселдези-биле чурттакчылар малды шын ажаап-карактаарын, бедик сүт дүжүдүн алырын чедип ап, арга-дуржулганы алыр. Аржаанның чыылда пунктузунга сүттү болбаазырадыр» – деп, суму чагыргазының даргазы Екатерина Тулуш дыңнаткан.
Көдээде чурттакчыларны деткииринче база агробизнести хөгжүдеринче угланган чаа төлевилелди ТР-ниң Көдээ ажыл-агый яамызының саналы-биле эгелээн. Ук эгелээшкин хууда дузалал ажыл-агыйларын биче бизнесче мөөңнеп, күрүне деткимчезинден эгелээш белен продукцияны садып-сайгарарынга чедир хандырар сорулгалыг.
ТР-ниң көдээ ажыл-агый яамызының, Чонну ажылга хаара тудар төптүң төлээлери ужуражылганың киржикчилеринге төлевилелдиң ужур-утказын, яамыдан көрдүнген грантылар дугайында тайылбырлап, арга-сүмезин кадып, айтырыгларынга тодаргай харыыларны берген.
