Тываның Чазааның аппарат хуралынга Чазак Даргазы Владислав Ховалыг “Улусчу картофель” губернатор төлевилелиниң чорудуу-биле, майның байырлалдар хүннерин картофель тарып олуртурунче ажыглап, социал албан черлериниң мурнунга ук ажылды организастаар сорулганы салган.
Бо чылын 8553 өг-бүле (эвээш орулгалыг 22454 өг-бүлениң 38 хуузу) картофель үрезинин алыр. Арткан өг-бүлелерниң «ийиги хлевиниң» үрезини эрткен чылгы дүжүдүнден курлавырлаттынган. Дыштаныр хүннерде төлевилелдиң он бир муң өг-бүлези картофельди тарып олуртур ужурлуг.
Барыын-Хемчик кожуунда «Улусчу картофель» төлевилел-биле бо чылын 388 өг-бүлени картофель үрезини-биле хандырар. Ол ышкаш 240 өг-бүле “борщ түүн” алыр. Барыын-хемчикчилер дыштаныр хүннерни хилис эрттирбейн, картофель тарыыр дээш белеткенип турарлар.
Тыва Республиканың Чазааның хөй ажы-төлдүг болгаш эвээш орулгалыг өг-бүлелерни деткээн кризиске удур хемчеглериниң бирээзинге “Улусчу картофель” губернатор төлевилели хамааржыр.
ТР-ниң Күш-ажыл яамызының 2022 чылдың январь 1-ниң сан-чурагайлары-биле алырга, республикада шупту 85330 өг-бүле бар, оларның 22,3 хуузу, азы 19025-и эвээш орулгалыг өг-бүлелерге санадыр.
