Малчын аалдарже үнүүшкүннер уламчылаар

Өвүр кожууннуң чагырга даргазы Айдыс Куулар мал кыштаглаашкынынче улуг кичээнгейни салып, аалдарже үнүүшкүннерни уламчылаарын дыңнаткан.

– Мал кыштаглаашкыны – көдээ ишчилерге кончуг харыысалгалыг үе. Кожуун чагыргазының болгаш көдээ ажыл-агый эргелелиниң ажылдакчылары ынаар улуг кичээнгейни салып турар.

Хөртүктей хадып каапкан кылын хар малчыннарның аргыжарынга бергедээшкиннерни тургускан. Орук чериниң, кожуун чагыргазының эр ажылдакчылары оруктар аштаар ажылдарже хаара туттунган. Ам база хат хадаанындан чамдык кыштагларже чедип алыры берге апарган деп дыңнадыглар келген. Ону база дарый шиитпирлээр бис.

Малчын аалдарже үнүүшкүннерни уламчылап, кыштаг бүрүзүнче барып чедер сорулганы салдывыс. Аалдарда сиген-ширбиил, немелде мал чеми, көдээ ишчилерниң чурттап турар оран-савазының чылыг, чырыын, кадыкшылын дээш ниити байдалын хынап, кандыг ачы-дуза херегин билип алыр ажылдар чоруттуп турар.

Көдээ черде малчын аалдардан ангыда, суму чагырга черлериниң даргалары-биле суурда мал-маган тудуп турар ишчилерни база эргий кезип, оларның байдалын билип алырын база демдеглексеп тур мен.

Ээлчеглиг хурал үезинде амыдырал-хандырылга, экономика, көдээ ажыл-агый, корум чурум талазы-биле адыр бүрүзүн кады деңге ажылдаарывысты база катап дагзыдым.