Үргүлчүлелдиг хар чаап, ону дүвүлей хадып каапканы, малчын турлагларже аргыжылганы бергедедип, малчыннарга нарын байдалдарны тургускан.
Чаа-Хөл кожууннуң болгаш сумулар чагырга черлериниң эр ажылдакчылары орук аштап-арыглаар далбый тыртар херекселди боттарының күжү-биле шеверлеп кылган. Кожуун иштинде малчын коданнарже чедер оруктарны үргүлчү хайгаарап, аргыжылга оруктарын аштап турарлар.
Хар аштаар техника малчын турлагларже хүннүң-не үнүп турар. Ажыл уламчылавышаан хевээр.
Малды чылдың дөрт эргилдезинде, дыштаныр шөлээ чок кадарып турар көдээ ишчилерже сагыш салып, оларга эптиг байдалды тургузары-биле ажылдап чоруур чаңгыс чер-чурттугларынга кожууннуң удуртулгазы четтиргенин илереткен.
Тываның Баштыңы Владислав Ховалыг кыштагларже база муниципалдыг оруктарны үе шаанда аштаарын күштелдирип, республиканың курлавырындан мал чемин ажыл-агыйларга үндүрүп, малдың баш санын чедирбес дээш деткимче ажылдарын чорударын айытканын сагындыраал.
