Манчүректе хой кыргылдазы дооступ турар

Сүт-Хөл кожууннуң Алдан-Маадыр сумузунуң ажыл-ишчи малчыннары чайгы үеде каас-чараш бойдус чурумалдыг Манчурек деп черде чайлаглап турарлар.

Манчүректиң девискээринде ниитизи-биле 68 чайлаг хонаш бар. Көдээ ишчилер көктүг-шыктыг черде 7000 хире баш шээр база 600 ажыг баш бода малды чайлагладып турар.

Бо хунде хой кыргылдазы дооступ (80 хуу) турар. Хууда кыргыкчылар бригадазын Шораан Ооржак удуртуп турар. Төрел-бөлүк хой кыргылдазы доозулгуже дээр, дериг-херекселдери-биле чепсегленип алгаш, аалдар кезип, ажылдаарлаар. Он кижиден тургустунган кыргыкчылар бригадазы шээр малды хол хачызы-биле кыргып чаңчылчаан.

Малчыннар хой кыргылдазын июль айның 12-ге чедир дооскаш, шээр малдын чуулдазынче кирер. Эрткен чылын Манчүректе Өрегелиг-Хавак деп черде кагдынган хой чуур оңгачаны септээш, мал эчилери ажыглалче киирген.

Чымыштыг ажыл-иш – хой кыргылдазы болгаш чуулдазы доосту бээрге, малчыннар Манчурекке ыдыктыг оваа дагылгазынга киржирлер.

Алдан-Маадыр сумузунуң чагырга даргазы Арбак Ооржак байырлал июль 14-16 хуннеринде болуп эртерин @tmgnews17 дыңнадып турар.

– Алдан-Маадыр сумузунуң ажыл-ишчи чону ыдыктыг оваа дагылгазынга идепкейлиг белеткенип турар. Байырлалга Тыва улустуң хөөмейжизи Х.С. Ооржактың 90 харлаан юбилейинге тураскааткан республика чергелиг сыгыт-хөөмей фестивалы, ча адарынга мөөрей, хол бөмбүүнге маргылдаа, хүрежи, чадаг чарыш, аът чарыжы, Манчүректиң малчыннарының аразынга суму чергелиг «Ыраажы малчын» деп мөөрей болур.

#Сүт_хөлкожуун #Алдан_маадыр #Хойкыргылдазы #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews