«Матпаадыр-2024» тоолчулар мөөрейиниң тиилекчилери

Сарыг-Сеп суурда С.О. Тамба аттыг төп үлегер-майыктың ном саңынга школачылар аразынга кожуун чергелиг «Матпаадыр-2024» деп II тоолчулар мөөрейи дүүн болуп эрткенин чагырга чери дыңнаткан.

Тоол – өгбелеривистиң аас чогаалының бир онзагай хуулгаазын хевири. Мөөрей чаңчыл езугаар игилдиң катаптаттынмас аялгазы-биле эгелээн. Киржикчи бүрүзү национал тыва идик-хевин кедип алгаш тоолун ыдып турган. Чамдыктары оттук-бижээнден бээр астынып алган.

23 өөреникчи улустуң тоолдарын төрээн дылында ыдып, күүсеткен. Тоолчуларны үш аңгы бөлүкке (эге, ортумак база улуг класстар) чарган.
Эге класстар аразынга бирги черни Бүрен-Хем школазының дөрткү классчызы Чалыма Биликты (удуртукчузу Галина Буянды); ортумак класстар аразынга Суг-Бажы школазының чедиги классчызы Алдын-Херел Монгуш (удуртукчузу Чочагай Монгуш), улуг класстар аразынга Сарыг-Септиң 2 дугаар школазының сески классчызы Күзел Монгуш (удуртукчузу Чойгаана Дабакай).

Каа-Хем кожууннуң төпчүткен ном саңының ажылдакчыры мөөрейниң шаңналдарын деткикчилээн. Бирги, ийиги, үшкү черлерни ээлээн уругларга «Филадельфия» кафезинин ийи муң, 1,5 муң, мун рубльдиң сертификаттарын тывыскан.

Мөөрейниң автору – С.О. Тамба аттыг төп үлегер-майыктың ном саңының национал болгаш чурт-шинчилел килдизиниң эргелекчизи Хилин Чинчи.

Ном саңының ажылдакчылары аалчыларын боорзак болгаш изиг сүттүг шайы-биле хүндүлээннер.