Тываның медицина албан черлери тускай шериг операциязының киржикчилеринге болгаш оларның өг-бүлелеринге дүрген эмчи дузазын чедирериниң чурумун чаарткан.
ТР-ниң Кадык камгалал яамызы республиканың медицина албан черлериниң арга-дуржулгазын өөренмишаан, шериг албан-хүлээлгелиглерге ачы-дуза чедиреринге таарымчалыг байдалды тургузарын хандырган «Тускай шериг операциязының киржикчилеринге, ол ышкаш дайынчы хөделиишкиннер хоочуннарынга болгаш оларның өг-бүлелеринге эмчи, реабилитация болгаш санаторлуг-курорт дузазын организастаарының дугайында» дужаал-биле бадылаан чаа системаны ажылдап кылган.
Дайынчылар болгаш оларның өг-бүлелери ээлчег чокка эмчилээр кылдыр поликлиникаларның регистратуразында аңгы көзенекти тускайлаан. Эмнелге албан черлеринге ындыг аарыг кижилерни хандырарын доктаамал хыналдада алган болгаш оларга чогумчалыг байдалдарны тургускан.
«Тускай шериг операциязының киржикчилеринге база оларның өг-бүлелеринге консультация бээр эмчилиг аңгы өрээлди дерээн, оларның аарыының көргүзүглери-биле эмнээшкин алыр маршрутту тургускаш, ээлчегге үе чидирип турбас кылдыр, чогуур эмчилерже кирер тодаргай шак үени айтып бээр. Ол шиитпир дайнычыларга болгаш оларның өг-бүле кежигүннеринге эмнээшкин маршрудунуң ажык-чарлыын хандырып, сагыш-сеткил дүвүрелин оожургадып, эмчи дузазын алырын дүргедедир» – деп, Тываның Баштыңы Владислав Ховалыг дыңнаткан.
Тускай шериг операциязының киржикчилеринге, ол ышкаш дайынчы хөделиишкиннер хоочуннарынга болгаш оларның өг-бүлелеринге бирги эмчи-санитар дузазын көргүзүп турар медицина албан черлериниң даңзызында 20 эмнелге организациязы бар: республиканың 1 дугаар эмнелгези, республиканың консультативтиг-диагностика төвү, республиканың уруглар эмнелгези база шупту төп кожуун эмнелгелери болгаш кожууннар аразының эмнелге төптери. Кол эмчилерниң оралакчыларын ол ажылды организастаар харыысалгалыг кижилер кылдыр томуйлаан. Эмнелге албан черлери тускай шериг операциязының киржикчилерин болгаш оларның өг-бүле кежигүннерин хандырганының дугайында регионнуң Кадык камгалал яамызынче неделя санында отчеттаар.
Албан чериниң дужаалы езугаар, тускай шериг операциязының киржикчизи бажыңынга ээп чанып келирге бир ай дургузунда диспансер шинчилгезин, херек апарза, немелде шинчилгелерни болгаш консультацияларны эрттирер. Ыраккы суурларда чурттап турар киржикчилерге доктаамал эмчи хайгааралы херек болза, телемедицина ачы-дузазын организастаар. Дайынчыга тускай, ооң иштинде бедик технологиялыг эмчи дузазын, ол ышкаш реабилитация болгаш паллиативтиг дузаны ээлчег чокка көргүзүп, тускай дериг-херекселдерни болгаш эмнерни аңгылап бээр.
Тускай шериг операциязының киржикчилериниң инвалид азы кадыкшылындан хамаарылга чокка, санаторлуг-эмнээшкинни база эмчи реабилитациязын мурнады эртер арганы бээр. 2025-2027 чылдарда Тыва Республикада халас эмчи дузазын көргүзериниң күрүне магадылалдарының девискээр программазында ол көрдүнген. Бир эвес киржикчиге федералдыг албан черлеринге ындыг эмнээшкинни эртери чугула апарза, путевканы бээр шиитпирни ээлчег чокка хүлээп алыр. Оон аңгыда, олар республика бюджединиң акша-хөреңгизи-биле диштерин халас кылдырар, херек эмнерни алыр эргелиг.
Тывада тускай шериг операциязының киржикчилериниң чоок улузу база эмчи дузазын ээлчег чокка ап болур. Чоок-кавызында поликлиникага келгеш, төрээн кижизи болганын бадыткаан документини көргүзер ужурлуг.
Чок болган болгаш ис чок читкен тускай шериг операциязының киржикчилеринче онза кичээнгей угланган. Полиликиникаларның бүрүткекчилери ол бөлүктүң аарыг кижилерин оочур чокка хүлээп алырын хандырып, бирги шинчилге түңнели-биле эмнелгеже чыдар апарза, неделя дургузунда ону организастаар.
Кадык камгалал яамызының медээзинден алырга, тускай шериг операциязының киржикчилери болгаш хоочуннары болур 25 хире кижи хүннүң-не поликлиникаларже эмчи дузазын дилеп кээп турар. Чыл эгезинден бээр оларның саны 2500 ажыг кижи четкен.
Бо чылын "Серебрянка" санаторий 250 тускай шериг операциязының киржикчилерин болгаш оларның өг-бүле кежигүннерин реабилитацияже хүлээп алыр, бо хүнге чедир 72 киржикчи база мөчээн дайынчыларның өг-бүлезиниң 82 кежигүнү эмнээшкинни алган. 132 шериг-албанныглар Хакас Республикада "Туманный" реабилитации төвүнге, а "Чедер" кадыкшылга төвүнге июньдан тура 31 кижи санаторлуг эмнээшкиннерни алган. Үш киржикчи РФ-тиң Кадык камгалал яамызының Г.А. Илизаров аттыг НЭМТ бедик технологиялыг ортопедия дузазын алган, дөрт аарыг кижини төпче чорударынга белеткеп турар.
