«Элээди журналист» бөлгүмүнүң кежигүнү, Кызылдың 9 дугаар гимназиязының 7 «г» клазының өөреникчизи Тамерлан Аннай космонавт Кирилл Песковтуң дугайында бижээнин немелде өөредилге сайзырадыр төвү дыңнаткан.
– Тываны октаргайдан көрүп болур деп кажан-даа бодавайн чораан мен. Шыны-биле алырга, бистиң бичии республикавыс көзүлбес деп бодаан мен. Чоокта чаа солун медээни билип алдым.
Республикавыстың чурттакчылары төөгүде бир дугаар космонавт Кирилл Песковтуң ачызында Черниң орбитазындан төрээн чуртувусту көөр аргалыг болган. Ол Бүгү-делегейниң космиктиг станциязының бортундан биче төрээн чериниң чуруун тырттырган.
Бистиң Тывавыс база Кызыл хоорай, космонавт чаңгыс чер чурттуувус делегей космонавтиказының төөгүзүнче киргени меңээ өөрүнчүг болган. Чүге дизе Кирилл Песков Кызыл хоорайга төрүттүнгеш, бирги базымнарын кылган.
Кирилл Песков 1990 чылда Кызыл хоорайга төрүттүнген. Ооң ачазы аэропортка ужудукчу кылдыр ажылдап чораан, а авазы – метереолог. Ооң соонда өг-бүле Красноярск крайның Назарово хоорайже көшкен. Кирилл аңаа школаны дооскаш, ачазының изин истеп, хамааты авиацияның ужудукчузу мергежилди чедип алган. Күзелдериниң күштүү, турум аажы-чаңы-биле оон-даа бедиктерже үнүп, космонавт болган.
Ооң бистиң республикавыска төрүттүнгенинге аажок чоргаарланыр мен. Тыва чуртун утпайн, бедиктерден Тываны көргүскенинге четтиргенимни илереттим.