Тывада 2021 чылдан бээр «Мен – башкы мен» төлевилел боттанып турарын ТР-ниң Өөредилге яамызы дыңнаткан. Төлевилел 336 салым-чаяанныг, боттарының арга-дуржулгазы база билиглери-биле регионнуң школачылары-биле үлежиринге белен аныяк башкыларны хаара туткан.
Англи болгаш төрээн дыл башкызы Сайдаш Таскый 2023 чылда төлевилелдиң киржикчизи болуп, бодунуң башкылаашкын ажыл-чорудулгазын Шагаан-Арыг хоорайның 2 дугаар школазынга эгелээн.
Аныяк башкы төлевилел ооң профессионал өзүлдезинге немелде курлавырларны бергенин демдеглээн. Билдингир башкыларның мастер-класстары, тренингилер болгаш вебинарлары амгы үениң өөредилге технологияларынга база башкылаашкынның психологтуг талазынга тураскааттынган.
– Бир дугаар өөредилге чылында чаңчыгып, чаа чүүлдерге өөренип турган болзумза, ам бодумда бүзүрел быжыккан. Ам кичээлди канчаар үре-түңнелдиг тургузарын билир мен: өөреникчилер-биле аразынга бүзүрелдиг байдалды болгаш эң-не шимченгир аудиторияның кичээнгейин хаара тудары дээн ышкаш» – деп, Сайдаш Шолбанович чугаалаан.
Ол бодунуң өөреникчилериниң чедиишкиннеринге өөрүп, чоргаарланып чоруур: «Клазывыста оолдар, уруглар сагыш-сеткил-даа, угаан-медерел-даа талазы-биле өзүп келген.
Өөреникчилер сайгарылгаларда идепкейлиг киржип, бердинген онаалгаларны шиитпирлээринге идепкейлиг апарган. Уругларның эртем-билиинде депшилгени эскерип, олар дээш өөрүп турар мен» – деп, ол демдеглээн.
Мергежилиниң аайы-биле шынарлары болгаш аажы-чаңы тургустунарынга дагдыныкчылар чугула үлүг-хуузун киирип турарын аныяк башкы демдеглээн. Ол сеткилиниң ханызындан төрээн дыл башкылары Вера Базыр-Сады, Чойгана Ажы база англи дыл башкызы Сайзана Дензинге четтиргенин илередип турар. Ол ышкаш ооң профессионал өзүлдезинге болгаш хууда шынарларынга улуг салдарны чедирген Ольга Сендиге аныяк башкы тускай өөрүп четтирген.
«Мен – башкы мен» төлевилел регионнуң өөредилге системазының хөгжүлдезинге кол рольду ойнап турар болгаш, школаларже аныяк кадрларны хаара тудары, өөреникчилерниң билииниң шынарын бедидеринге, аныяктарның чогаадыкчы арга-шинээн сайзырадырынга дузалаар.