Тыва Республиканың бирги чери дээш эр болгаш херээжен улус аразынга "Шагаа-2022" байырлалга тураскааткан "Тыва ча адар оюн: баг адар хевири" маргылдаа Тос-Булакка болуп эрткен.
Шылгараан багжыларның аткан огу ара барбазын, салган согуну соора барбазын деп йөрээп, чыылганнар болгаш эрттирикчилер маргылдаа киржикчилеринге эки күзээшкиннерни кылган.
Эр багжылар аразынга мергеннер: бирги чер – Артыш Монгуш (Барыын-Хемчик ); ийиги чер – Айдың Хомушку (Бай-Тайга); үшкү чер – Арсен Монгуш (Чөөн-Хемчик); дөрткү чер – Олег Чалчып (Улуг-Хем); бешки чер – Мөңгүн-оол Монгуш (Чөөн-Хемчик).
Херээжен багжылар аразынга бирги черни Даяна Бюрбю (Кызыл), ийиги черни Раиса Тутатчикова (Кызыл), үшкү черни Чинчи Монгуш (Кызыл), дөрткү черни Чимис Кыргыс (Тес-Хем), бешки черни Мактармаа Куулар (Кызыл) олар чаалап алган.
Өгбелерден дамчып келген үш адаан мөөрейлиг оюнунуң бирээзи – тыва ча адар оюнну Тываның спорт яамызы, «Тыва» спорт школазы база Тыва Үндезин культра төвү эрттирген.
