«Межегейхөмүр» уургайы Тываның бюджединче алды катап хөй үндүрүгнү шилчиткен

«Межегейхөмүр» хөмүр-даш компаниязы» кызыгаарлаттынган харыысалгалыг ниитилел республиканың каттышкан бюджединче 2022 чылда 83 сая ажыг рубль хемчээлдиг үндүрүг төлевирин кииргенин, Тываның Экономиктиг хөгжүлде яамызы дыңнаткан.

Барык ийи хире чыл ажылдаан соонда, «Межегейхөмүр» уургайы эрткен чылын ажылын катап эгелеп, үлетпүр бүдүрүлгезиниң чорудуу-биле эки көргүзүглерни республикага эккелгениниң түңнелинде, Тыва үлетпүр бүдүрүлгезиниң индекизи-биле Россия Федерациязының эң мурнуку 10 черинде лидер регионнар санынче киргенин сагындыраал.

Тываның Экономиктиг хөгжүлде яамызының сан-чурагайы-биле алырга, компания долу күчүзүнче кирип, эрткен чылын Тыва Республиканың Чазааның инвестиция дугуржулгазы-биле доктааткан тускай сорулгалыг шупту көргүзүглерин ажыр күүсеткен. 300 муң тонна хемчээлдиг хөмүр казып-тывар планын 558 муң тонна, азы 180 хуу күүсеткен. Инвестиция төлевилелин күүседиринге 400 сая рубль хемчээлдиг хуу инвестицияларны хаара тудар тургаш, 422,9 сая рубль, азы 105 хуу кылдыр күүсеткен.

Бүдүрүлге 250 ажылчын олуттар тургузар тургаш, херек кырында 385 олутту ажыткан. Тыва Республиканың республика бюджединче 14 сая рубль үндүрүг төлевирин киирер планны 593 хуу чедирип, 83,1 сая рубльди шилчиткен.

2010 чылда Тывада Межегей чыдымында хөмүр тывыш комплекизин тудуп, Евразхолдингиниң адаанда тургузуу – «Межегейхөмүр» компанияны ажылдатканын сагындыраал. Хөмүрнүң ол улуг чыдымында 213,5 сая тонна хөмүр бары санаттынган. 2013 чылда хөмүрнү ажык черден, оон чер адаандан казып үндүрүп турар.

Пандемия мурнунда эң-не хөй – бир сая тонна ажыг хөмүрнү казып тыпканы демдеглеттинген. Чылда 7,7 сая тонна хөмүр казар төлевилел күчүзүнге арай ам-даа четпээн. 2020 чылда хөмүрге хереглел батканындан, компания тывыш ажылдарын түр соксадып, ону чүгле 2022 чылда катап эгелээн.

«Межегейхөмүр» компания республика Чазаа-биле дугурушканы езугаар, ырактан кээп ажылдаар ажылдакчыларны тус черниң чурттакчыларындан тускай мергежилдиглер-биле солаан. Чурттуң өөредилге черлеринде даг мергежилдеринде өөредилгелерни организастаан.

2013 чылдан 2016 чылга чедир бүдүрүлгениң акша-хөреңгизи-биле 65 кижи өөренип алган. Ак-Довурактың техникум баазазында даг угланыышкынынга кадрлар белеткээр чаа бөлүктерни ажыдарынга компания үлүүн киирген.