Моолче кирер дээн автомашиналарның саны 170 чедип турар

Өвүр кожууннуң чагырга чериниң дыңнадып турары-биле алырга, бо хүннерде Россия-Моол күрүне кызыгаарын «Хандагайты – Боршоо» хыналда-эрттирилге пунктузу таварты Моолче кирер дээн автомашиналарның саны 170 чедип турар.

– Хыналда-эрттирилге пунктузунуң чангыс хүннүң дургузунда ынча хөй автомашинаны эрттирери берге. Ооң уржуундан күрүне кызыгаарының чоогунда хондур-дүндүр улус ээлчээн манап турар. Ынчангаш чугула ажыл-херээ чок улусту кызыгаар эрттерин сүмелевейн тур бис.

Агаар-бойдус сооп келген, даштыгаа автомашина иштинге хонары дыш чок болгаш берге. Хар чаап, туманнап турар үеде орук-чирик айыылдыг болурун билир бис. Бичии уруг-дарыг эдерткен ажыы шуут чок. Чурттакчы чонувуска, аргыжылга хөй үеде, кызыгаар эртери берге апаарын дыңнадып тур бис – деп, кожууннуң чагырга даргазының хүлээлгезин күүседип турар Айдыс Куулар соцчеткилерде бижээн.

Россияның Айыыл чок чорук албанының Тыва Республикада Кызыгаар эргелелиниң медээзи-биле Чоннуң чаңгыс деминиң хүнүн байырлаарының ужу-биле ноябрь 4, 5, 6 хүннеринде Россия Федерациязының күрүне кызыгаарының «Хандагайты – Боршоо», «Цагаан-Тологой», «Шара-Нуур» кызыгаар аразының эрттирилге пунктулары санитарлыг хүннерни чарлаанын сагындыраалы.