Национал школа хөгжүдер институттуң директору Елена Куулар баштаан бөлүк ажылдакчылар Кызылдың аэропортунга Моолдуң эртемнер академиязының Делегей чергелиг шинчилелдер институдунуң директору Дашням Золбоо болгаш Российжи шинчилелдер килдизиниң эргелекчизи Норовсамбуу Наранжаргалды уткуп алганын институт дыңнаткан.
Чымыштыг үш хүннүң дургузунда институттуң ажылдакчылары моол эртемденнер-биле делегей чергелиг IV сарыг шажын шуулганның байырлыг хуралынга киржип, “Буддийжи делегейниң чурттарының хүрээ-хииттериниң архитектуразының онзагайлары”, “Буддийжи болгаш национал культураның ыдыктарын туризмге болгаш хүндүлээчел чорукка ажыглаары”, “Делегейде болгаш Россияда конфессиялар биле аңгы-аңгы чүдүлгелер аразында харылзаалар” дээш оон-даа өске шөлчүгештерге ажылдаан.
Шуулганның хүндүлүг аалчылары “Көшкүн чоннар өртемчейиниң кавайы” деп культурлуг хемчегни сонуургап көрген. Ол ышкаш Үстүү-Хүрээ биле Сүме даанда Будда башкының ыдыктап каан овур-хевирлери-биле танышкан.
Моолдан аалдап келген эртемденнер биле институттуң удуртулгазы моон-даа соңгаар кады ажылдаарын дугурушкан.
