Москвада Тываның төлээ черинге чогаалчылар-биле ужуражылга

Тыва дылдың хүнүнде Москвада Тываның төлээ чери чурттуң дээди өөредилге черлеринде өөренип турар студентилерге чогаалчылар-биле ужуражылганы организастап эрттирген.

Төлээ чериниң бүрүн эргелиг төлээзиниң хүлээлгезин күүседип турар Михаил Новиков байырлыг хемчегни ажыткан. Ол Тыва дыл хүнү-биле байыр чедиргеш, төрээн дылының кижиге ужур-дузалыын демдеглээн.

Ужуражыышкынга Россия Федерациязының культуразының алдарлыг ажылдакчызы, шүлүкчү, очулдурукчу Артык Ховалыг, чогаалчы Зоя Донгак, чогаалчы Донгак Бегзиниң оглу Алексей Бегзи киришкен.

Москвада Тываның төлээ чериниң ажылдакчызы Урана Куулар аалчыларны таныштырып, оларга сөс берген. Чогаалчы Зоя Донгак шүлүктерин номчаан. Алексей Бегзи ачазы Донгак Бегзиниң, соңгу адазы билдингир эртемден Доруг-оол Монгуштуң, авазы Регина Бегзиниң, Александр Пальмбахтың дугайында сактыышкын кылган.

Артык Ховалыг студентилерге база аалчыларга “Коңгулуур ыры “ деп сонет номун белекке берген. Парлаарынга белеткээн бир тыва дылга, ийи орус дылга үш номнарының таныштырылгазын база кылган. Тыва дыл хүнүнде номчукчуга чогаалчының белээ ол. Удавас “Өндүр өкпең өң”, “Фиолетовая святость” деп сонет номнарын, орус дылга тоожуну номчукчулар алыр.

Аныяк-өскенге таныштырылга кылдыр Артык Ховалыг бодунуң допчу-намдарын парлааш, үлээн. Айтырыгларга долу харыыларны берген.Чаа шүлүк бижип эгелээн студент уругга дагдыныкчы болурунга база чөпшээрешкен. Ассоциация даргалап тургаш, чүс-чүс авторлары эдип, чазап башкарган, парлаан дагдыныкчыга ол солун ужуражылга болган.
Артык Ховалыг “Өндүр сеткил”, “Коңгулуур ыры” деп номнарындан сонеттерни чыылганнарга номчуп берген.

Москвада Бижек Комбу, Анна Ламажаа, Артык Ховалыг, Урана Куулар, Зоя Донгак чогаалчылар ажылдап, өөренип чурттап чоруур.