Муңчу малчын болур сорулгалыг

Амыдырал-чуртталгага чүү-даа турар. Кижи частырыгны кылгаш, тайып ушкаш, хөй-ниитиниң ачызында, даянып туруп кээр аргалыг. Чүгле ону үезинде угаап медереп, шын орукту шилип алыр ужурлуг. “Чаа сорук” төлевилели амыдырал-чуртталганы чогудуп, ойлук чок эрткен үезинче катап ээлбес, арганы берип турар.

Кызыл-Мажалык сумузундан Кара-кат биле Шолбана Ооржактарның аныяк өг-бүлези 2021 чылда “Чаа сорук” төлевилелдиң киржикчилериниң санынче киргеш, ийи чүс шээр малды алганнар. Кызымак, ажылгыр кежээ өг-бүле үш ожук дажы дег оолдарлыг. Олар өөредилгеден хостуг үезинде аалынга келгеш, ада-иезинге дузалажыр чаңчылдыг.

– Өг-бүлевис ук төлевилелдиң киржикчизи болганынга аажок өөрүүр-дүр мен. Хойувус чыл эгезинде оолдап эгелээрге, хураганнарывысты чаптап, бажыңывыс иштинге бичии үгек кылып алгаш, аңаа азырап турдувус. Чымыштыг үеде оолдарывыс оътка кире берген хураганнарынга сигенни баглаар, оңгачага суун кудар, суланы чиртир дээш кажаадан үнместей бээрлер.

Кышты хүр ажары-биле сиген-ширбиил, немелде мал чемин чедер кылдыр белеткеп алган бис. Амгы үеде шээр малывыс өзүп, мандып немежип турар. Чүткүлдүг, кежээ-ле болза, кижи күзээнин чедип алыр. Малывыстың баш санын ам-даа өстүрүп, муңчу малчыннар санынче кирер бис – деп, Кара-кат Ооржак чугаалап турар.

Барыын-Хемчик кожууннуң көдээ ажыл-агый эргелелиниң дыңнадып турары-биле алырга, кожуунда “Чаа сорук” төлевилелинге 2020 чылда чеди, 2021 чылда беш өг-бүле киришкен.

#Барыын_хемчиккожуун #Кызыл_мажалык #Чаасорук #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews