Мугур-Аксынче үш дизельдиг станцияны чедирер

ТР-ниң Одалга болгаш энергетика яамызы найысылалда бирээзи-ле 500 кВт күчүлүг үш дизельдиг электри станцияны «Дизель» кызыгаарлаттынган харыысалгалыг ниитилелдиң чагыы-биле эккелгенин дыңнаткан.

Тываның Баштыңы Владислав Ховалыгның даалгазы езугаар дизельдиг станцияларын немей садар-биле акшаландырыышкынны республиканың бюджединден үндүрген. Чоокку үеде ону эптеп тургузар болгаш ажыглалче киирер дээш Мөңгүн-Тайга кожууннуң төвү Мугур-Аксы сумузунче чедирер.

Амгы үеде Мугур-Аксыда чырык хандырылгазы үзүктелиишкин чок. Немей саткан дизельдиг станциялар ыраккы сумуга электри хандырылгазының үзүктелиишкин чок бүзүрелдиг күчү курлавыры болур. Ооң ачызында чырык хереглелиниң айтырыы шиитпирлеттинер.

Мөңгүн-Тайга кожууннуң чагырга чериниң даргазы Чойган Иргит чоокта чаа сургакчылап кээп чораан ТР-ниң энергетика сайыдының албан-хүлээлгезин күүседип турар Эдуард Куулар аазаанын күүсеткенин соцчеткилерде бижээн.

Тываның Баштыңы Владислав Ховалыг ук яамыга ырак-узак кожууннарның суурларынга электри хандырылгазын үзүктелдирбес сорулганы салган.